Tags-Dariya

tanhā.ī kā dukh gahrā thā
maiñ dariyā dariyā rotā thā

guzarnā hai jise sahrā se ho kar
maiñ us dariyā ke dukh se āshnā huuñ

vo jo laayā thā ham ko dariyā tak
paar akele utar gayā kab kā

ek nazar dekhā thā us ne aage yaad nahīñ
khul jaatī hai dariyā kī auqāt samundar meñ

sarishk-e-chashm aur āh-e-sozāñ ne mere ai vaa.e ek pal meñ
bahut se jañgal kiye haiñ sarsabz aur kitne sukhā.e dariyā

darūn-e-girdāb ab jo jā kar phañsī hai kashtī hamārī yārab
sarishk-e-yās ab bhī hai jo āñkhoñ se kyā kaheñ mājrā-e-dariyā

habāb un ko na samjho yaaro ye uThte paanī meñ haiñ jo har-dam
badan khulā jo kisī kā dekhā khule haiñ ye īda-e-dariyā

havas kisī ko ho dekhne kī jo mauj-e-be-intihā-e-dariyā
to aa ke chashmoñ ko dekhe merī ki yaañ se hai ibtidā-e-dariyā

uThā.egā jab talak na 'nusrat' tū varta-e-ishq kī mashaqqat
to haath āvegā kyūñki tere vo gauhar-e-be-bahā-e-dariyā

ashk āñkhoñ meñ pahuñch kar dil meñ phir vāpas ga.e
yuuñ samajh le chaḌhte dariyā kā utarnā aa gayā

chhoḌ de āsān rasta zindagī dushvār kar
jis taraf dariyā chaḌhā ho us taraf se paar kar

tumhārī yādoñ ke chaḌhte dariyā ko ḳhushk-sālī se kyā ta.alluq
tumhārī yādoñ kā chaḌhtā dariyā har ek mausam meñ bah rahā hai

tamām hijr ke māroñ sā shab ke dariyā meñ
maiñ Duub jā.ūñ vahī chāñd kā ghaḌā le kar

haath shal ho ga.e shanāvar ke
ab ye dariyā hai be-kanār bahut

dariyā kī tah chaTān kī zad ko bhī sah ga.ī
lekin ye kyā ki sat.h pe ik shor mach gayā

ai mire dariyā agar koī bharosa ho tirā
chhoḌ jā.ūñ maiñ tirī lahroñ se kashtī bāñdh kar

ham tah-e-dariyā tilismī bastiyāñ ginte rahe
aur sāhil par machhere machhliyāñ ginte rahe

kabhī āñkheñ samundar sī saḳhī haiñ
kabhī dariyā meñ ik qatra nahīñ hai

mahtāb to niklā hī nahīñ Duub ke 'fāḳhir'
lekin mire dariyā meñ vahī madd-o-jazar hai