Tags-Dariya

merā qissa kisī afsānā-e-dariyā meñ nahīñ
merī tārīḳh kisī safha-e-sahrā meñ nahīñ

vo dāman kā har ik ḳhār-e-muġhīlāñ se ulajhnā
tūl-o-arz dasht-o-dariyā paar kar jaanā

dariyā kī mauj hī meñ nahīñ iztirāb hai
sañg-e-ravāñ ke dil meñ bhī ik zaḳhm-e-āb hai

saare dariyā phuuT paḌeñge ik duuje ke biich
ik din aa kar mil jā.egī terī merī pyaas

duur duur tak sannāTā hai koī nahīñ hai paas
aa jā dariyā hoñT se lag jā pī le merī pyaas

raat saarī kisī TuuTī huī kashtī meñ kaTī
aañkh bistar pe khulī ḳhvāb meñ dariyā dekhā

ḳhvāhish pe mujhe TuuT ke girnā nahīñ aatā
pyāsā huuñ magar sāhil-e-dariyā pe khaḌā huuñ

safar meñ raah ke āshob se na Dar jaanā
paḌe jo aag kā dariyā to paar kar jaanā

dariyā ke riste sāgar se
qatra qatra jā miltā hai

pukārte rahe mahfūz kashtiyoñ vaale
maiñ Dūbtā huā dariyā ke paar utar bhī gayā

dariyā-dilī se abr-e-karam bhī nahīñ milā
lekin mujhe nasīb se kam bhī nahīñ milā

āḳhir ġham-e-jānāñ ko ai dil baḌh kar ġham-e-daurāñ honā thā
is qatre ko banñā thā dariyā is mauj ko tūfāñ honā thā

ye tirī aañkh ke dhoke ke sivā kuchh bhī nahīñ
ek bahte hue dariyā ko kinārā na samajh

pyaas is ret kī ashkoñ se bujhā.ūñ kaise
ḳhushk dariyā ke muqaddar meñ bhī paanī likh de

ab to sūraj oḌh ke baiThūñgā 'qayyūm'
maiñ ik ThanDe yaḳh dariyā se guzrā huuñ

ubhartā chāñd mirā ham-safar thā dariyā meñ
maiñ Dūbte hue sūraj ko muḌ ke taktā kyā

is bastī meñ is dhartī par sairābī-e-jāñ kā haal na pūchh
yaañ āñkhoñ āñkhoñ aañsū haiñ aur dariyā dariyā paanī hai

hai jin ke bāzuoñ meñ dam vo dariyā paar kar leñge
bahut mumkin hai Dūbeñ vo jo baiThe haiñ safīne meñ

agarche roz mirā sabr āzmātā hai
magar ye dariyā mujhe tairnā sikhātā hai