Tags-Dariya

aaj bhī 'yāvar' hañste hañste aañkh meñ aañsū aa jaate haiñ
dard kī maujeñ ḳhuun kī lahreñ aag kā dariyā kyā nahīñ dekhā

ab ye dariyā ye talātum ye safīna kyā hai
ham to sab bhuul ga.e tum ko sahārā kar ke

ye us ke pyaar kī bāteñ faqat qisse purāne haiñ
bhalā kachche ghaḌe par kaun dariyā paar kartā hai

chhū luuñ hoñToñ se to dariyā ko bhī sahrā kar duuñ
pyaas terī mire hoñToñ pe samā.ī huī hai

hoshiyār ai mast-o-madhosh-e-javānī hoshiyār
ishq vo dariyā hai jo minnat-kash-e-sāhil nahīñ

mujh se dariyā-nosh ko saaqī pilātā hai sharāb
dekhtā huuñ maiñ bhī zarf-e-shīsha-o-paimāna aaj

shāyad ab rūdād-e-hunar meñ aise baab likhe jā.eñge
sāmne dariyā bahtā hogā log sarāb likhe jā.eñge

hamārī duniyā hai ek dariyā ke jaisī 'ājiz'
vo jis kā har ik kinārā dukh hai hamārā dukh hai

dariyā kī kyā bisāt ki mujh ko Dubo sake
kashtī kahīñ kahīñ mirī Dolī hī kyuuñ na ho

dariyā kī tarah ravāñ huuñ lekin
ab tak bhī vahīñ huuñ maiñ jahāñ huuñ

karam hai dariyā-diloñ kī zīnat kahāñ baḳhīloñ kī hai ye tīnat
use tavañgar nahīñ kaheñge jo koī mohtāj-e-dil ġhanī hai

āḳhirī kashmakash hai ye shāyad
mauj-e-dariyā meñ aur safīne meñ

achchhī misāl bantīñ zāhir agar vo hotīñ
in nekiyoñ ko ham to dariyā meñ Daal aa.e

nahīñ pyāse ko qatra bhī mayassar
jo hai sairāb use dariyā milā hai

mirī tishna-labī par hañsne vaale
guzishta vaqt maiñ dariyā rahā huuñ

sāzish-e-dariyā-o-sāhil se to mumkin hai magar
mujh ko ye maujeñ Dubo deñ nā-ḳhudā mumkin nahīñ

ḳhud se das-bīs baras aur baḌe lagte haiñ
ghar banāte hue dariyā ke kināre bachche

ab to dariyā meñ bañdhe baiThe haiñ dariyā kī tarah
ab kināroñ kī taraf dhyān kahāñ jaatā hai

maiñ pyaas bujhāne pahuñchā to
dariyā meñ sahrā phail gayā