Tags-Dariya

gumāñ hadd-e-nazar tak kyā thā lekin kyā nazar aayā
jidhar dariyā kī maujeñ thiiñ udhar sahrā nazar aayā

maiñ dariyā de rahā huuñ kashtiyoñ ko
vo mujh ko nā-ḳhudā.ī de rahā hai

pyaas ke hāthoñ mirā qatl huā hai 'nomān'
dost dariyā the magar paas na aayā koī

ye alag baat ki ham sā nahīñ pyāsā koī
phir bhī dariyā se ta.alluq nahīñ rakkhā koī

hamārā naam likhā thā kabhī jo ret par us ne
kabhī jab yaad aa.e to vo dariyā yaad aatā hai

ḳhushk dariyā hai na dariyā pe hai pahra lekin
har taraf pyaas kā ḳhūñ-rañg samāñ rahtā hai

bhūlī nahīñ vo zulm ki 'shabnam' sar-e-furāt
ātish ko aab dasht ko dariyā likhā gayā

mazmūn-e-ishq zehn-e-sitamgar meñ aa gayā
dariyā simaT ke halqa-e-sāġhar meñ aa gayā

jiine kā shauq le aḌe tāroñ se duur duur
mazbūt haath maut kā dariyā meñ pheñk de

kis dil kī baat kaheñ ham tum kis dil kā dard saheñ ham tum
dil patthar hai dil shīsha hai dil sahrā hai dil dariyā hai

kaifiyat hī koī paanī ne badal lī ho kahīñ
ham jise dasht samajhte haiñ vo dariyā hī na ho

paanī thā magar apne hī dariyā se judā thā
chaḌhte hue dekhā na utarte hue dekhā

unhīñ galiyoñ meñ jab rote the ham 'mīr'
ka.ī dariyā kī dhāreñ ho ga.ī haiñ

nishāñ ik purānā kināre pe thā
use mauj-e-dariyā bahā le ga.ī

mirā rāz-e-dil āshkārā nahīñ
vo dariyā huuñ jis kā kinārā nahīñ

bahut ġhurūr hai tujh ko ai sar-phire tūfāñ
mujhe bhī zid hai ki dariyā ko paar karnā hai

shadīd pyaas thī phir bhī chhuā na paanī ko
maiñ dekhtā rahā dariyā tirī ravānī ko

ghar meñ kyā ġham ke sivā thā jo bahā le jaatā
merī vīrānī pe hañstā rahā dariyā us kā

paanī le sakte haiñ dariyā se magar kuuze meñ ham
bahte dariyā kī ravānī band kar sakte nahīñ

kyā jaane kab kis saa.at meñ tab.a ravāñ ho jaa.e
ye dariyā be-mausam bhī tuġhyānī kartā hai