Tags-Dariya

kuchh to Thahre hue dariyā meñ ravānī kareñ ham
aao duniyā kī haqīqat ko kahānī kareñ ham

ḳhauf thā dasht utar jaa.e na mujh meñ tab hī
chashm-e-tishna kā makīñ bahtā huā dariyā kiyā

taaki dariyāoñ kī vahshat rahe haavī sab par
Duub jaatā huuñ maiñ dariyā ke kināre sāhab

haiñ munqasim ye ḳhūñ-bār āñkheñ
jin kī badaulat dariyā huā dil

phaaḌ kar dāman-e-sahrā niklā
mere andar se jo dariyā niklā

roiye jitnā rulā.e hijr-e-yār
ghar meñ baiThe sair-e-dariyā dekhiye

ishq dariyā hai jo tere vo tahī-dast rahe
vo jo Duube the kisī aur kināre nikle

aañkh meñ dariyā liye phirte rahe barsoñ tak
jis ke siine meñ utar jaatā vo sahrā na milā

na pūchho bahr-e-mohabbat meñ kuchh hamārā haal
jo kuchh hai āfat-e-dariyā so apnī naav pe hai

kidhar Dubo ke kahāñ par ubhārtā hai tū
ye kaisā rañg hai dariyā tirī ravānī kā

hastī hai judā.ī se us kī jab vasl huā to kuchh bhī nahīñ
dariyā meñ na thā to qatra thā dariyā meñ milā to kuchh bhī nahīñ

sailāb meñ tinke raqsāñ the maujoñ se safīne larzāñ the
ik dariyā thā sau tūfāñ the dariyā na rahā to kuchh bhī nahīñ

kis pyaas se ḳhālī huā mashkīza hamārā
dariyā se jo uTh aa.e haiñ sahrā kī taraf ham

sat.h-e-dariyā par ubharne kī tamannā hī nahīñ
arsh par pahuñche hue haiñ jab se gahrā.ī milī

dariyā kī ravānī ko 'zafar' chhoḌiye filhāl
thoḌā sā ye hoñToñ ko bhigonā hī bahut hai

thake baiThe the kuchh panchhī lab-e-dariyā jinheñ 'as.ad'
ham apnī par-shikasta ḳhvāhishoñ kā kārvāñ samjhe

ye jo phuuT bahā hai dariyā phir nahīñ hogā
rū-e-zamīñ par manzar aisā phir nahīñ hogā

dekh dariyā isī ko kahte haiñ
jo kināroñ meñ rah ke bahtā hai

ye us ke pyaar kī bāteñ faqat qisse purāne haiñ
bhalā kachche ghaḌe par kaun dariyā paar kartā hai

merī ummīd ke sūraj ko Dubo ke har shaam
vo dikhātā rahā dariyā kā tamāsha mujh ko