Tags-Dariya

biich dariyā ke ajab jashn bapā hai yaaro
saath kashtī ke koī mauj-e-balā chaltī hai

dariyā bahā rahī tū ai chashm-e-zār kyuuñ
dam bhar bhī TūTtā nahīñ ashkoñ kā taar kyuuñ

sū-e-dariyā ḳhanda-zan vo yār-e-jānī phir gayā
motiyoñ kī aabrū par aaj paanī phir gayā

jab dhartī sahrā sahrā thī
ham dariyā dariyā ro.e the

rakhte to haiñ girdāb-e-yam par Dar hai ye ai chashm-e-tar
girdāb-e-dariyā kī tarah khāte haiñ yaañ chakkar bhī ham

mire ham-safīr bulbul mirā terā saath hī kyā
maiñ zamīr-e-dasht-o-dariyā tū asīr-e-āshiyāna

lab-e-dariyā pe dekh aa kar tamāshā aaj holī kā
bhañvar kaale ke daf baaje hai mauj ai yaar paanī meñ

ve din ga.e ki āñkheñ dariyā sī bahtiyāñ thiiñ
sūkhā paḌā hai ab to muddat se ye do-ābā

un kī dariyā-dilī ko dekheñ ham
aaj dāman hameñ baḌhāne do

jin safīnoñ ne kabhī toḌā thā maujoñ kā ġhurūr
us jagah Duube jahāñ dariyā meñ tuġhyānī na thī

jaane ye dil kā dard kahāñ tak satā.egā
dariyā chaḌhe to us ko utar jaanā chāhiye

koī dekhe mirī āñkhoñ meñ aa kar
magar dariyā meñ sahrā kaun dekhe

'mīr' har-yak mauj meñ hai zulf hī kā sā dimāġh
jab se vo dariyā pe aa kar baal apne dho gayā

kitne dinoñ ke pyāse hoñge yaaro socho to
shabnam kā qatra bhī jin ko dariyā lagtā hai

tishnagī ke bhī maqāmāt haiñ kyā kyā yaanī
kabhī dariyā nahīñ kaafī kabhī qatra hai bahut

us ke qarīb-e-chashm kahāñ hai ḳhaal dilā Tuk ġhaur se dekh
kaifiyyat se mast paḌe dariyā ke kināre sote haiñ

akele milte haiñ sahrā ho yā ki dariyā ho
kisī ke saath nahīñ ham na apne saath koī

phir ret ke dariyā pe koī pyāsā musāfir
likhtā hai vahī ek kahānī ka.ī din se

sar se pā tak use ḳhushbū kā ḳhazāna kahiye
baiThe dariyā meñ utar jaa.e to paanī mahke