Tags-Dariya

harf-e-tadbīr na thā harf-e-dilāsa raushan
maiñ jo Duubā to huā sāhil-e-dariyā raushan

tishna-labī ne ret ko dariyā banā diyā
paanī kahāñ thā varna kisī reg-zār meñ

hai johd-e-munfarid sabab-e-kārobār-e-dahr
ik iztirāb-e-qatra hai dariyā kaheñ jise

sāhiloñ kā bhī na ehsāñ thā gavārā mujh ko
itnā dariyā ke talātum ne sañvārā mujh ko

tishnagī jam ga.ī patthar kī tarah hoñToñ par
Duub kar bhī tire dariyā se maiñ pyāsā niklā

ik sakūñ pā gayā jā kar tah-e-dariyā patthar
ab balā koī nahīñ sar se guzarne vaalī

kahīñ thā maiñ mujhe honā kahīñ thā
maiñ dariyā thā magar sahrā-nashīñ thā

ubhartā hī nahīñ dil Duub kar bahr-e-mohabbat meñ
jab aa jaatī hai is dariyā meñ tuġhyānī nahīñ jaatī

ret sahrā nahīñ, ret dariyā nahīñ
ret bas ret hai

hai vo dariyā meñ nahātā maiñ huuñ ġharq-e-āb-e-sharm
kuchh ajab ik mājrā hai Turfa-tar donoñ taraf

suḳhan kā ye narm-sail dariyā Dhale to ik ābshār bhī hai
nasheb-e-dil tak utar ke paḌhnā baḌī tavānā.iyāñ likhī haiñ

vahshat pe merī arsa-e-āfāq tañg thā
dariyā zamīn ko araq-e-infi.āl hai

regzāroñ se pare kheñch rahā hai koī
jaane kas dasht meñ dariyā mujhe bhaTkā.egā

jā ke dariyā meñ pheñk aayā huuñ
ye kyā hai tirī nishānī kā

kaTī huī hai zamīñ koh se samundar tak
milā hai ghaav ye dariyā ko rāsta de kar

us kināre ne kahā kyā kyā kahūñ kyā baat thī
baat aisī thī ki dariyā paar karnā paḌ gayā

use bhī hādisa kahiye ki ḳhushk dariyā par
paḌī jo dhuup to patthar pighal ke bahne lage

vo qatra huuñ ki mauja-e-dariyā meñ gum huā
vo saaya huuñ ki mahv huā āftāb meñ

palkoñ pe aa ke ruk sī ga.ī thī har ek mauj
kal ro liye to aañkh se dariyā utar gayā

lab-e-dariyā hai tasvīroñ kā mela
khaḌe haiñ ā.ina-bardār mere