Tags-Dariya

kitne paanī sar se guzre merī zabāñ na khulī
sāhil sāhil dariyā dariyā maiñ ḳhāmosh rahā

pyaas jis nahr se Takrā.ī vo banjar niklī
jis ko pīchhe kahīñ chhoḌ aa.e vo dariyā hogā

in chaTānoñ meñ kahāñ ye hausla rokeñ mujhe
kartā huuñ 'jāved' maiñ bhī sūrat-e-dariyā safar

apne aks ko chhūne kī ḳhvāhish meñ parinda Duub gayā
phir kabhī lauT kar aa.ī nahīñ dariyā par ghaḌī duāoñ kī

yuuñ to nahīñ ki pahle sahāre banā.e the
dariyā banā ke us ne kināre banā.e the

kyā jaane kis se bigḌī hai dariyā meñ 'mus.hafī'
lahroñ ke hāthoñ meñ haiñ jo talvāreñ nañgiyāñ

nazar meñ chashm-e-tar meñ yā kabhī āġhosh-e-dariyā meñ
guhar takmīl hotā hai magar āhista āhista

mauj-e-dariyā kī tarah zabt meñ aa saktā nahīñ
koī kyuuñ kar kahe ahvāl-e-pareshāñ merā

kohsāroñ pe barf jab se pighlī
dariyā tevar badal rahe haiñ

ek aañsū yaad kā Tapkā to dariyā ban gayā
zindagī bhar mujh meñ ek tūfān sā paltā rahā

tujhe chāñd ban ke milā thā jo tire sāhiloñ pe khilā thā jo
vo thā ek dariyā visāl kā so utar gayā use bhuul jā

aaj kyuuñ āñkhoñ meñ pahle se nahīñ haiñ aañsū
aaj kyā baat hai kyuuñ mauj meñ dariyā kam hai

dekh kar suukh gayā kaise badan kā paanī
maiñ na kahtā thā mirī pyaas se dariyā kam hai

ishq se tere baḌhe kyā kyā diloñ ke martabe
mehr zarroñ ko kiyā qatroñ ko dariyā kar diyā

kar ke mahrūm unheñ āb-e-ravāñ se ham ne
naam be-āb guzargāhoñ kā dariyā rakkhā

kisī ne apnī naav kyā utārī
ye dariyā jaise pāgal ho rahā hai

bahte dariyā kī vo lahreñ sachchī thiiñ
naav māñjhī aur kināre jhūTe the

mirī pinhā.ī-e-ilm-o-ḳhabar kī intihā ye hai
ki ik qatre se nā-vāqif huuñ dariyā-āshnā ho kar

dariyā thā saath phir bhī ajab bebasī rahī
sairāb ham hue to magar tishnagī rahī