Tags-Dariya

dil ho saaqī lab-e-dariyā sāġhar
sahl hai pyaas bujhānī merī

vaqt ke bahte dariyā meñ
kitne sūraj Duube the

dariyā sahrā aur sarāb
manzar saare phīke the

qatra huuñ maiñ dariyā meñ mujhe kuchh nahīñ ma.alūm
ham-rāh mire kaun hai maiñ kis se judā huuñ

ek dariyā ko dikhā.ī thī kabhī pyaas apnī
phir nahīñ māñgā kabhī maiñ ne dobārā paanī

nekī Daal ke dariyā meñ
apne aap se dhokā kar

fart-e-ġham-o-alam se jab dil huā hai giryāñ
us ne ināyatoñ ke dariyā bahā diye haiñ

ravāñ rakhte haiñ ham ko dasht-e-dariyā dhuup darvāze
sarāboñ se safar meñ tishnagī maujūd rahtī hai

aarzū ke bahr-o-dariyā kī kahānī kyā kahūñ
is kā sāhil aur hai is kā kinārā aur hai

falak pe chāñd nikaltā hai aur dariyā meñ
balā kā shor ġhazab kā ubaal rahtā hai

ye kaisī be-āb zamīñ kā sāmnā thā
ḳhud ko qatra qatre ko dariyā bhuul gayā

varaq-e-sañg pe tahrīr kareñ naqsh-e-murād
aur bahte hue dariyā meñ Dubo.e jaa.eñ

chhīñT ik uḌ ke mirī aañkh meñ aa.ī to khulā
ek dariyā abhī tah-dār paḌā hai mujh meñ

dil apnī talab meñ sādiq thā ghabrā ke sū-e-matlūb gayā
dariyā se ye motī niklā thā dariyā hī meñ jā kar Duub gayā

ek hī baar nahīñ hai vo dobāra kam hai
maiñ vo dariyā huuñ jise apnā kināra kam hai

ajab hai raat se āñkhoñ kā aalam
ye dariyā raat bhar chaḌhtā rahā hai

haath mire patvār bane haiñ aur lahreñ kashtī merī
zor havā kā qaa.em hai dariyā kī ravānī baaqī hai

kabhī aur kashtī nikāleñge ham
abhī apnā dariyā hai Thahrā huā

'farāz' kis ne mire muqaddar meñ likh diye haiñ
bas ek dariyā kī dostī meñ sarāb saare

rāt-din khoj meñ dariyā kī sadā rahtī hai
aadmī koī tire gaañv meñ us paar kā hai