Tags-Dariya

isī qadar hai hayāt o ajal ke biich kā farq
ye ek dhuup kā dariyā vo ik kināra-e-shām

ek dariyā ko pī liyā ham ne
phir bhī baaqī hai tishnagī tauba

kyuuñ bhalā kachche makānoñ kā tumheñ aayā ḳhayāl
tum to dariyā the tumheñ tez guzar jaanā thā

dariyā ba-hubāb-andar tūfāñ ba-sahāb-andar
mahshar ba-hijāb-andar honā ho to aisā ho

dil ishq meñ be-pāyāñ saudā ho to aisā ho
dariyā ho to aisā ho sahrā ho to aisā ho

vo dariyā pe mujh ko bulātā rahā
magar maiñ saf-e-tishnagāñ meñ rahā

be-takalluf phir to khevā paar hai
maujzan qatra meñ dariyā chāhiye

nihāñ hai gauhar-e-maqsūd jeb-e-ḳhud-shanāsī meñ
ki yaañ ġhavvās hai timsāl aur ā.īna dariyā hai

sāhiloñ par tere istiqbāl ko aayā hai kaun
Dūbne vaale ubhar phir sat.h-e-dariyā par nikal

sar-ba-sar Duub gayā raat ke sannāTe meñ
chāñdnī jis ko maiñ samjhā thā vo dariyā niklā

pyaas paanī ke tajassus meñ bhaTaktī hai jahāñ
duur tak ret kā dariyā hai ḳhudā ḳhair kare

ret kā tuudā āñdhī kī faujoñ par tiir chalā.e Tahnī peḌ chabā.e
chhoTī machhlī dariyā meñ ghaḌiyāl se bair kare maulā ḳhair kare

lo dekho 'hamīdī' lab-e-dariyā pe hai dariyā
par pyaas hai kab kī ye patā kyuuñ nahīñ karte

naav na Duubī dariyā meñ
naav meñ dariyā Duub gayā

guhar banā ke sadaf ne use nikālā hai
kabhī jo buuñd ne dariyā se inhirāf kiyā

bulbul kā lahū kūcha-e-qātil meñ bahā yuuñ
jaise ho koī mauja-e-dariyā mire aage

vo daur ki dariyā bhī thā ik qatrā-e-be-āb
ab qatra-e-be-āb hai dariyā mire aage

baḌh ga.ī kuchh tāqat-e-guftār bhī raftār se
shor paidā mauj-e-dariyā meñ ravānī se huā

ishq ne phir hameñ ik baar hai baḳhshā sahrā
dariyā milnā bhī nahīñ abr barasnā bhī nahīñ

āvārgī kā Dar na koī Dūbne kā ḳhauf
sahrā hī ās-pās na dariyā yahīñ kahīñ