Tags-Death

bāzār-e-hastī jaate haiñ kyā kyā ḳhvāhish le kar lekin
maut ḳharīd ke le aate haiñ kyuuñ ki zarā sastī aatī hai

zindagī bhī hai mirī āñkhoñ meñ
maut bhī dīda-e-hairān meñ hai

mutlaq nahīñ muhāl ajab maut dahr meñ
mujh ko to ye hayāt hī hairat kī baat hai

maut kī saḳhtī maiñ ne samjhī
māthe par niklā jo pasīna

jāda-e-mehr-o-vafā meñ mar ke zinda ho gayā
maut hai merī hayāt-e-jāvidāñ mere liye

zindagī mehrbāñ nahīñ to phir
maut kyuuñ dard-āshnā hogī

hai maut kā rañg mirā jīvnā jiyūñ dhundlā charāġh huuñ maiñ
sakrāt kī zulmat ek taraf hastī kī tohmat ek taraf

maut aa.egī jo rusvā.ī kā sāmāñ hogā
chaak dil hogā agar chaak garebāñ hogā

tirī vafā meñ milī ārzū-e-maut mujhe
jo maut mil ga.ī hotī to koī baat bhī thī

had-e-idrāk se bāhar haiñ bāteñ ishq o mastī kī
samajh meñ is qadar aayā ki dil kī maut hai duurī

maut aur aarzū kī maut 'ziyā'
haañ bahut mutma.in hai ab koī

kuchh maut kā na ġham hai na kuchh rāhat-e-hayāt
kūche meñ us ke mujh ko bahār-o-ḳhizāñ hai hech

har nafas maut kī baḳhshī huī mohlat jaise
koī jiinā hai ye jiinā ise jiinā na kaho

jo ġham meñ jalte rahe umr-bhar diyā ban kar
bujhā ga.ī hai unheñ maut ab havā ban kar

maut se pahle mar gayā huuñ maiñ
zindagī ko kafan kiye hue huuñ