Tags-Death

maut kā intizār baaqī hai
aap kā intizār thā na rahā

ab garm ḳhabar maut ke aane kī hai
ġhāfil tujhe fikr āb-o-dāne kī hai

nazar-e-iltifāt ban ga.ī maut
mirī qismat ko aap kyā kiije

shab-o-roz lab pe hai ai 'vafā' ye duā ki maut hī de ḳhudā
jo yahī hai mere nasīb meñ ki asīr-e-dām-e-balā rahūñ

dekhī haiñ aisī un kī bahut mehrbāniyāñ
ab ham se muñh meñ maut ke jaayā na jā.egā

ḳhanjar āzād haiñ sīnoñ meñ utarne ke liye
maut āzād hai lāshoñ pe guzarne ke liye

bas ek maut kī had tak pahuñch sakī hai nigāh
kahāñ milī abhī dariyā-e-sānehāt kī thaah

apne kāñdhoñ pe liye phirtā huuñ apnī hī salīb
ḳhud mirī maut kā mātam hai mire jiine meñ

zindagī ḳhud meñ 'amar' ḳhush thī bahut
maut ne kar dī sharārat kaisī

baqā meñ thā fanā kā martaba hāsil shahīdoñ ko
vahāñ is par amal thā maut se pahle hī mar jaanā

fanā kahte haiñ kis ko maut se pahle hī mar jaanā
baqā hai naam kis kā apnī hastī se guzar jaanā

yahāñ kā zinda rahnā maut se bad-tar samajhtā huuñ
hayāt-e-jāvidāñ hai karbalā meñ jā ke mar jaanā

be-qarāroñ ko kab qarār aayā
maut bhī aa.ī par na yaar aayā

hai maut kā payām kināroñ kī zindagī
ma.asūm machhliyoñ se kaho jaal meñ na aa.eñ

bālīñ pe tum jab aa.e to aa.ī vo maut bhī
jis maut ke liye mujhe jiinā zarūr thā

zindagī maut se kuchh kam na thī ai jān-e-hayāt
tere iqrār se pahle tire inkār ke ba.ad

shab-e-intizār meñ bār-hā mujhe 'anvar' aisā gumāñ huā
jise maut kahtā hai ye jahāñ vo kisī ke vaade kā naam hai

thā ādam-e-ḳhākī ġhazab be-zinhār
par maut ke hāthoñ se huā hai nā-chār

kaise aa saktī hai aisī dil-nashīñ duniyā ko maut
kaun kahtā hai ki ye sab kuchh fanā ho jā.egā

yā vasl ho yā maut koī tarah to hove
kab tak rahūñ pāmāl maiñ is dard-o-alam kā