Tags-Death

ye dard-e-mohabbat ġham-e-duniyā to nahīñ hai
ab maut bhī jiine kā sahārā na rahegī

tirī be-ruḳhī aur tirī mehrbānī
yahī maut hai aur yahī zindagānī

zindagī maut ke pahlū meñ bhalī lagtī hai
ghaas is qabr pe kuchh aur harī lagtī hai

na hī zindagānī kamāl hai na hī maut merā zavāl hai
ki javāb jis kā na mil sakā mire zehn meñ vo savāl hai

hayāt o maut kī ġhārat-garī kā haal na pūchh
jo maut na ban sakī vo 'adam' hayāt huī

merī duniyā mirī zindagī tak hī hai aur ik din merī maut ke saath hī
ḳhātma merī duniyā kā ho jā.egā merī duniyā mire saath mar jā.egī

chhūT jā.eñge musībat se ab inshā-allāh
hijr meñ maut ke āsār nazar aate haiñ

zindagī baiThī thī apne husn par bhūlī huī
maut ne aate hī saarā rañg phīkā kar diyā

lagā ke siine se shādābiyoñ ko so jaatā
mujhe bahār-e-javānī meñ maut aa jaatī

bar aa.eñ hasrateñ kyā kyā agar maut itnī fursat de
ki ik baar aur zinda sheva-e-ishq-e-javāñ kar luuñ

thā maut kā khaTkā jāñ-farsā sad shukr ki niklā vo kāñTā
gar ho na qayāmat kā dhaḌkā ab to haiñ baḌe ārām se ham

qaid-e-hayāt o band-e-ġham asl meñ donoñ ek haiñ
maut se pahle aadmī ġham se najāt paa.e kyuuñ

hayāt o maut kī had meñ haiñ valvale chup-chāp
guzar rahe haiñ dabe paañv qāfile chup-chāp

maut ḳhāmoshī hai chup rahne se chup lag jā.egī
zindagī āvāz hai bāteñ karo bāteñ karo

ḳhatm hone ko hai qissa-e-zindagī ab hameñ aap se koī shikva nahīñ
Tal na jaa.e kahīñ maut aa.ī huī pursish-e-ġham kī zahmat na farmā.iye

zahr-e-tanhā.ī-e-ġham pī ke mohabbat meñ 'ḳhayāl'
kis tarah maut ko jiine kā sahārā kahiye

ziist ne murda banā rakkhā thā mujh ko hijr meñ
maut ne dikhlā diyā aa kar masīhā.ī kā rañg

betāb maut kī ye lalak zindagī bhī hai
yuuñ intizār-e-maut meñ mar hī na jā.iye

apne qātil kī zehānat se pareshān huuñ maiñ
roz ik maut na.e tarz kī ījād kare

ufuq ke us paar zindagī ke udaas lamhe guzār aa.uuñ
agar mirā saath de sako tum to maut ko bhī pukār aa.uuñ