Tags-Death

qaid-e-hayāt o band-e-ġham asl meñ donoñ ek haiñ
maut se pahle aadmī ġham se najāt paa.e kyuuñ

ab tak mere gītoñ meñ ummīd bhī thī paspā.ī bhī
maut ke qadmoñ kī aahaT bhī jīvan kī añgḌā.ī bhī

jab tak tujh ko maut na aa.e kar le rain-baserā baabā
aatī jaatī is duniyā meñ kyā merā kyā terā baabā

le chalī maut ba-sad-shauq hameñ saath apne
na huā jab koī sāmāñ tire ghar jaane kā

maut bhī sahal kuchh nahīñ apnī
kis liye tāqat-āzmā hai dil

chāhat ho yā puujā sab ke apne apne sāñche haiñ
jo maut meñ Dhal jaa.e vo paikar achchhā lagtā hai

maut laa.ī hai payām-e-iḳhtitām-e-ranj-o-ġham
aa gayā vo vaqt ba.ad-e-intizār aa hī gayā

āḳhrī hichkī tire zaanū pe aa.e
maut bhī maiñ shā.irāna chāhtā huuñ

dhuul kā ik zarra na uḌe āvāz kare parchhā.īñ bhī
maut bhī aa kar martī nahīñ thī vo vīrāna dekhā hai

hijr jaise vasl meñ us ko sunā to yuuñ lagā
maut jaisī zindagī meñ zindagī āvāz hai

maut ke din qarīb aa pahuñche
haa.e ham ne to kuchh kiyā hī nahīñ

maut ne saarī raat hamārī nabz TaTolī
aisā marne kā māhaul banāyā ham ne

ḳhūb-o-zisht-e-jahāñ kā farq na pūchh
maut jab aa.ī sab barābar thā

hādse zindagī kī alāmat haiñ lekin vo ik hādsa
ham jise maut kahte haiñ

yahī zindagī mirī zindagī yahī zindagī mirī maut hai
tirī yaad ban ga.ī ik chhurī jo mire gale pe dharī rahī

zindagī ik savāl hai jis kā javāb maut hai
maut bhī ik savāl hai jis kā javāb kuchh nahīñ

aise jāñ-bāzoñ kī ban jaa.e na kyuuñ maut hayāt
muskurāte hue 'āsī' jo sar-e-dār aa.e

zindagī kyuuñ na mire maut pe un kī jo log
muskurāte hue zindāñ se sar-e-dār aa.e

koī ahl-e-dil ko kamī nahīñ magar ahl-e-dil kā ye qaul hai
abhī maut bhī nahīñ mil sakī abhī zindagī meñ kasar bhī hai

vahī dard bhī hai davā bhī hai vahī maut bhī hai hayāt bhī
vahī ishq nāvak-e-nāz hai vahī ishq sīna-sipar bhī hai