Tags-Death

thak gayā jab jism-o-jāñ ke bojh ko Dhote hue
chal diyā vo maut ke āġhosh meñ sote hue

yuuñ maut pe maiñ jaan ko qurbān na kartā
tū ne mujhe shāyad koī paiġhām diyā thā

jī rahā huuñ maiñ ki auroñ se bhī hai vābastagī
maut aa jaa.e agar koī pareshānī na ho

tamām sat.heñ ulaT rahī haiñ hayāt kī maut kī ḳhudā kī
jo tere dil se ubhar ke aate haiñ aise sailāb ham hue haiñ

maiñ apnī maut ko ab zindagī samajhtā huuñ
maiñ kyuuñ samajhtā huuñ merā ḳhudā samajhtā hai

ai saaz kyuuñ na maut ko āvāz dījiye
gar aap ko qubūl nahīñ umr-bhar kī qaid

auj-e-himmat pe rahā terī vafā kā ḳhurshed
maut ke ḳhauf pe ġhālib rahī ḳhidmat kī umed

maut mahrāshTra kī thī yā tirī marne kī ḳhabar
murdanī chhā ga.ī insān to kyā patthar par

maut ne raat ke parde meñ kiyā kaisā vaar
raushani-e-sub.h vatan kī hai ki mātam kā ġhubār

'mus.hafī' ye jo haiñ amiir o faqīr
dil meñ hai maut kā ḳhatar sab ke

haañ magar kal ishq ko dekhā ki vo shorīda-baḳht
baḌh chukā thā zindagī meñ maut se dīvāna thā

pechīda zindagī ke karo tum muqaddame
dikhlā hī degī maut natīja nikāl ke

maut chamkī kisī shamshīr-e-barhana kī tarah
raushnī dil meñ utartī huī dekhī ga.ī hai

nikal paḌe haiñ makānoñ ko chhoḌ kar shahrī
jab aabrū pe ban aa.ī to maut kī Thahrī

mahrūmiyoñ kā bār-e-girāñ dosh par liye
ai maut sun ki tere qarīb aa ga.e haiñ ham

maut lamhe kī sadā zindagī umroñ kī pukār
maiñ yahī soch ke zinda huuñ ki mar jaanā hai

maut bhī to use nahīñ aatī
ho chukā hai jo zindagī se udaas

rāz-e-hayāt-o-maut kā uqda jo khol de
mil jaa.e jis se ḳhvāb meñ tābīr ḳhvāb lā

maut aatī hai to ik farz adā hotā hai
in ko dhokā hai qazā ko jo qazā kahte haiñ

maut kī god meñ jab tak nahīñ tū so jaatā
tū 'sadā' chain se hargiz nahīñ sone vaalā