Tags-Death

is qadar jald maut aa.egī
haa.e insāñ ko ye na thā ma.alūm

mujhe ab maut behtar zindagī se
vo kī tum ne sitamgārī ki tauba

maut ko jānte haiñ asl-e-hayāt-e-abadī
zindagānī ko magar ḳhār-o-zabūñ kahte haiñ

kyā ajab thā jo maut aa jaatī
ġham to ye hai hayāt meñ gum huuñ

use jakḌā huā thā zindagī ne
sirhāne maut baiThī ro rahī thī

maut ke ḳhauf se har saañs rukī jaatī hai
zindagī aaj koī terā ḳharīdār bhī hai

maut kuchh mere liye laa.e to laa.e shāyad
zindagī kā to sabhī Dhab mirā dekhā huā hai

sochiye gar use har-nafas maut hai kuchh mudāvā bhī ho be-hisī ke liye
sūrajoñ kī virāsat milī thī hameñ dar-ba-dar ho ga.e raushnī ke liye

aise jiine pe 'rind' ḳhaak paḌe
maut us zindagī pe hañstī hai

mushtahar maut kī aarzū ne use
muztarib kar diyā is qadar ek din

maut ne ruuh bhar nikālī hai
fikr ne pahle khā liyā hai mujhe

maut aa.ī hai mujhe o bahr-e-ḳhūbī vasl meñ
merā beḌā Dūbne vaalā lab-e-sāhil kā hai

kaun kahtā hai ki maut aa.ī to mar jā.ūñgā
maiñ to dariyā huuñ samundar meñ utar jā.ūñgā

ye maut na thī qudrat ne tire sar par rakkhā ik tāj-e-hayāt
thī ziist tirī merāj-e-vafā aur maut tirī merāj-e-hayāt

jis saañs meñ duniyā jaañ paa.e us saañs kī nik.hat kyā kahiye
jis maut pe hastī naaz kare us maut kī azmat kyā kahiye

tahzīb jahāñ tharrātī hai tārīḳh-e-bashar sharmātī hai
maut apne kaTe par ḳhud jaise dil hī dil meñ pachhtātī hai

kyā qayāmat hai burā ho maut kā
ham na hoñ ye ālam-e-ījād ho

maut hañstī hai ḳhizar ke haal par
tā-kujā hastī-e-be-buniyād ho

mere pīchhe koī na ro.egā
maut ke saath jā rahā huuñ maiñ

koī jab chhoḌ jaatā hai to dil kī maut hotī hai
bahāreñ be-sabab haiñ jab koī apnā nahīñ hotā