Tags-Death

maut kyoñ is qadar aziiz huī
ziist se koī Dar gayā shāyad

jahāñ meñ maut se bhāgoge jitnā
ye utnā bāñheñ phailātī rahegī

zindagī aur maut meñ ik farq thā ham se 'munīr'
miT ga.e ham farq un ke darmiyāñ bhī miT gayā

zindagī bhī barham hai maut bhī ḳhafā sī hai
āj-kal to donoñ meñ aap kī udāsī hai

ghabrā.e jitnā maut kī dil-bastagī se ham
begāna utne hote ga.e zindagī se ham

maut ko shah de kar tum ne samjhā thā ab to maat huī
maiñ ne jism kā ḳhol utaar ke soñp diyaa... aur ruuh bachā lii!

maut uktā chukī rehearsal meñ
roz do chaar shaḳhs marte haiñ

darmiyāñ jo jism kā parda hai kaise hogā chaak
maut kis tarkīb se ham ko milā.egī na pūchh

maut bar-haq hai ek din lekin
niiñd rātoñ ko ḳhuub aatī hai

havā-e-maut zarā der kyā idhar aa.ī
ki mere haath se uḌ kar mire ġhubāre ga.e

naza.a kī saḳhtī baḌhī un ko pashemāñ dekh kar
maut mushkil ho ga.ī jiine kā sāmāñ dekh kar

saare jhagḌe agar mere jiine ke haiñ to galā ghoñT do maiñ bhī be-zār huuñ
maut ab tak to dāman bachātī rahī tū bhī dāman bachā.e to maiñ kyā karūñ

kyā irāda hai mirī ziist kā maiñ kyā jānūñ
kashtī-e-umr mirī maut se Takrā.ī hai

maut kā vaar to meñ sah gayā hañste hañste
zindagī tū hī koī choT lagā kaarī sī

ziist mushkil sahī magar ai dost
maut āsān rahguzar na samajh

maut se kyuuñ itnī vahshat jaan kyuuñ itnī aziiz
maut aane ke liye hai jaan jaane ke liye

aa.ina dekh ke kahte haiñ sañvarne vaale
aaj be-maut mareñge mire marne vaale

maut hī aap ke bīmār kī qismat meñ na thī
varna kab zahr kā mumkin thā davā ho jaanā

shahīd-e-ishq kī ye maut hai yā zindagī yārab
nahīñ ma.alūm kyuuñ bajtī hai shahnā.ī ka.ī din se

shikāyat-e-dil-e-muztar kahāñ talak ai maut
duā.eñ dūñgā tujhe gar ise qarār aayā