Tags-Death

kitnā dilkash fareb-e-hastī hai
zindagī maut ko tarastī hai

maut se khel ke karte ho mohabbat 'ājiz'
mujh ko Dar hai kahīñ be-maut na maare jaao

har vaqt haiñ maut kī duā.eñ
allāh re lutf zindagī kā

kartī hai maut jaise ta.āqub hayāt kā
titlī girī fazā se to jaale meñ rah ga.ī

kahte haiñ log maut se bad-tar hai intizār
merī tamām-umr kaTī intizār meñ

yā maut aa.egī mujhe yā niiñd aa.egī
aur ek shab guzār to duuñ intizār meñ

maiñ bhalā kis se kahūñ kyā kyā kahūñ kaise kahūñ
maut se pahle hī mar jaane kī ḳhvāhish dil meñ hai

qurbāñ jo hue haq par kab maut unheñ aa.ī
sadiyoñ ke tasalsul meñ vo zinda nazar aa.e

sukūn ho kis tarah mayassar nasīb ho chain kaise āḳhir
na maut aa.ī marīz-e-ġham ko na vo shab-e-intizār aayā

zindagī se maut ik ik gaam par
bar-sar-e-paikār hai tere baġhair

vo jab chalā gayā yahāñ se phir mujhe ḳhabar huī
ki maut pāltā rahā huuñ zindagī kī aaḌ meñ

roz baqā-e-bāham kī tajvīz pe ham ghul-mil jaate haiñ
baiTh ke aksar maut kināre vo likhtī hai maiñ paḌhtā huuñ

zindagī palkeñ bichhā de ki baḌī mushkil se
maut ne tere liye vaqt nikālā hogā

gar nujūmī koī paḌh saktā hai hāthoñ kī lakīreñ
maut kā merī use tai vaqt batlānā paḌegā

maiñ pairahan-e-hastī meñ bahut uryāñ sā dikhā.ī detā huuñ
ai maut mirī uryānī ko malbūs-e-'adam' pahnā denā

maut kī zad kā ḳhatar har fard ko har ghar meñ hai
ye baḌā ik aib ai duniyā tirī chausar meñ hai

vo nahīñ maut sahī maut nahīñ niiñd sahī
koī aa jaa.e shab-e-ġham kā muqaddar ban ke

maut kī niiñd ke mātoñ pe na kyuuñ rashk aa.e
jāgnā hai unheñ hañgāma-e-mahshar ban ke

zindagī ne luuTā hai zindagī ko dānista
maut se shikāyat kyā maut kā bahānā thā

martā nahīñ huuñ maut kī be-hāsilī pe maiñ
jiitā agar huuñ ulfat-e-hāsil na kah ise