Tags-Death

ġham-e-zindagī kā ilaaj to kabhī maut se bhī na ho sakā
ye vo saḳht qaid-e-hayāt hai kisī tarah jis se mafar nahīñ

ġhurbat kī maut bhī sabab-e-zikr-e-ḳhair hai
gar ham nahīñ to naam rahegā zamāne meñ

maut ke saa.e meñ 'tāriq' aarzū kī dhuup thī
kārobār-e-zindagī be-e'tibārāna chalā

maut hastī pe vo tohmat thī ki āsāñ na uThī
zindagī mujh pe vo ilzām ki mushkil se uThā

kahāñ se manzar sameT laa.e nazar kahāñ se udhār māñge
rivāyatoñ ko na maut aa.e to zindagī intishār māñge

maut pyārī jo lagā kartī hai
is qadar kyuuñ hai ġhamīñ yaad nahīñ

yuuñ akelā dasht-e-ġhurbat meñ dil-e-nākām thā
pīchhe pīchhe maut thī aage ḳhudā kā naam thā

ḳhvāhishoñ kī maut kā yaaro bhalā chāhā karo
phailtī tārīkiyoñ meñ chāñd kā charchā karo

tifl ne kuchh bhī nahīñ sochā milā kar likh diyā
zindagī aur maut ko bilkul barābar likh diyā

maut jab aa.e to raahī jaan ho
is safar meñ rāhbar kā kaam hai

tū hañse hai maut ko aur maut hañstī hai tujhe
maut ko hañsnā nahīñ hai ḳhuub ai ġhāfil na hañs

maut kī pahlī alāmat sāhib
yahī ehsās kā mar jaanā hai

mar ga.e sar phoḌ ke dīvār-e-zindāñ se asiir
zindagī kunj-e-qafas meñ maut se pyārī na thī

maut se yaarī na thī hastī se be-zārī na thī
us safar par chal diye ham jis kī tayyārī na thī

us ne sun kar bhī an-sunī kar dī
maut bhī merī mo'atabar na huī

maut kā dam sabā ġhanīmat hai
varna pal pal hayāt ne maarā

āḳhirī baar mujhe khīñch ke siine se lagā
aur phir dekh mujhe maut kā Dar koī nahīñ

maut ban jā.ūñgā terī ai sitamgar dekhnā
mujh pe jo ḳhanjar uThegā maiñ usī ḳhanjar meñ huuñ

kis ko hai marne kī fursat sab yahāñ masrūf haiñ
maut tū bekār meñ aa.ī hai aise shahr meñ

maut ke baad bhī tujh ko hai bhulānā mushkil
jiite jī tujh ko bhulā duuñ ye kahāñ mumkin hai