Tags-Aarzoo

idhar mirā dil taḌap rahā hai tirī javānī kī justujū meñ
udhar mire dil kī aarzū meñ machal rahā hai shabāb terā

deñ aarzū ko rañg-e-rah-e-yār-e-ḳhush-ḳhirām
fursat mile to 'āsif'-o-'ḳhālid' bhī yuuñ kareñ

aarzū thī jis ko paane kī hameñ
justujū us aarzū tak aa ga.ī

khul gayā un kī aarzū meñ ye raaz
ziist apnī nahīñ parā.ī hai

maiñ haath bāñdhe hue lauT aa.ī huuñ ghar meñ
ki mere pars meñ ik aarzū marī huī hai

mujh se bhī kuchh sivā hai unheñ merī aarzū
ye shauq vo nahīñ jo udhar ho idhar na ho

na aarzū koī badlī na merī mahrūmī
badal gayā hai ravayya samāñ nahīñ badlā

kabhī ḳhauf thā tire hijr kā kabhī aarzū ke zavāl kā
rahā hijr-o-vasl ke darmiyāñ tujhe kho sakā na maiñ pā sakā

jiine se bhar chukā hai dil-e-zār kyā karūñ
marne kī ārzū-o-tamannā nahīñ abhī

ārzū-dar-ārzū baḌhtī ga.iiñ mahrūmiyāñ
har tamannā rafta rafta dushman-e-jāñ ho ga.ī

bahut dinoñ meñ huā ahl-e-ārzū ko mayassar
vo qurb-e-ḳhās jahāñ terī yaad be-adabī hai

vo mujh se farmā rahe haiñ hañs kar hamesha milne kī aarzū par
malāl hogā muhāl shai kī kabhī tamannā na kījiyegā

ik ik qadam fareb-e-tamannā se bach ke chal
duniyā kī aarzū hai to duniyā se bach ke chal

ye chaman kī aarzū hai koī luuT le chaman ko
ye tamām rañg-o-nik.hat tire iḳhtiyār meñ hai

kis zindagī ke vāste daulat kī aarzū
dekho natīja ġhaur se qārūñ ke maal kā

baaqī hai ab bhī tark-e-tamannā kī aarzū
kyūñkar kahūñ ki koī tamannā nahīñ mujhe

aisā chubhā hai nashtar-e-bedād-e-ārzū
ham zindagī meñ phir koī armāñ na kar sake

kuchh yuuñ chalī thī bād-e-havādis ki ki umr-bhar
qindīl-e-ārzū ko farozāñ na kar sake

thī shahīdān-e-vatan kī ik zarā sī aarzū
aur vo thī desh ko aage nikalnā chāhiye

ye kis ne aise ujāloñ kī aarzū kī thī
har ek ghar yahāñ jaltā dikhā.ī detā hai