Tags-Aarzoo

sarāpā aarzū hone ne banda kar diyā ham ko
vagarna ham ḳhudā the gar dil-e-be-mudda.ā hote

siine pe haath hai na nazar ko talāsh-e-bām
dil saath de to aaj ġham-e-ārzū kareñ

din aarzū ke yūñhī udāsī meñ kaT ga.e
vo apne dukh meñ apnī pareshāniyoñ meñ thā

kisī aarzū kī rahī nahīñ hai mire dil meñ kuchh bhī samā.e ab
mujhe sāqiyā mai-e-lutf se tū ne kyā hī ḳhuub chakhā diyā

saa.e ke pīchhe bhāgte phirne se fā.eda
har aarzū ko jism ke paikar meñ Dhaal do

ham apnī nafs-kushī kī taraf nahīñ maa.il
ki apnā jism to bas aarzū se zinda hai

jo terī aarzū mujh ko na hotī
to koī dūsrā āzār hotā

kabhī vo pyaar se ik phuul laa.e
bahut din se mirī ye aarzū hai

ārzūmand koī ho to kahūñ
mere dil meñ bhī ik tamannā hai

judā vo hote to ham un kī justujū karte
alag nahīñ haiñ to phir kis kī aarzū karte

sochā thā un se baat nibhā.eñge umr bhar
ye aarzū bhī tishna-e-takmīl rah ga.ī

yā tirī aarzū sā ho jā.ūñ
yā tirī aarzū kā ho jā.ūñ

mire ġham haiñ kitne ajiib se vo milā kahāñ hai nasīb se
yahāñ qurb kī mujhe aarzū vahāñ duur hī se salām hai

dhuāñ sā uThtā hai dil se jo sochtā huuñ kabhī
vo kaun the jo mirī aarzū meñ ḳhaak hue

ai 'naqsh' iztirāb-e-dil-o-jāñ ko kyā karūñ
barbād kar rahā hai ġham-e-ārzū mujhe

taskīn de sakeñge na jām-o-subū mujhe
bechain kar rahī hai tirī aarzū mujhe

puurī huī na sar ko kaTāne kī aarzū
kāñdhoñ pe mere dil kī tamannā rukī rahī

ek ḳhvāb dekhne kī aarzū rahī
isī liye tamām umr so na paa.e ham

aane vaale mausamoñ ko tāzgī miltī ga.ī
apnī fasl-e-ārzū ko ham ḳhizāñ kahte rahe

balā-e-jāñ hai magar phir bhī aarzū hai tirī
ham us ko apne kaleje se haiñ lagā.e hue