Tags-Aarzoo

kis tarah apnī tamannāoñ kā maiñ kartī shumār
bas tujhe paane kī har-dam aarzū kartī rahī

tirī justujū tirī aarzū mujhe kaam tere hī kaam se
tū hī zindagī kā hai mudda.ā mirā naam tere hī naam se

aarzū ko dil hī dil meñ ghuT ke rahnā aa gayā
aur vo ye samjhe ki mujh ko rañj sahnā aa gayā

mujhī meñ gum haiñ ka.ī tīrgī ba-kaf rāteñ
ziyā-farosh sar-e-tāq-e-ārzū bhī maiñ

yahī nahīñ ki faqat tirī justujū bhī maiñ
ḳhud apne aap ko paane kī aarzū bhī maiñ

aarzū kī ye sazā hai ki zamāna hai ḳhilāf
un se milne kī ḳhudā jaane sazā kyā hogī

mujhe bhī yuuñ to baḌī aarzū hai jiine kī
magar savāl ye hai kis tarah jiyā jaa.e

kuchh is qadar thī garmī-e-bāzār-e-ārzū
dil jo ḳharīdtā thā use dekhtā na thā

yahāñ to be-fursatī ke hāthoñ vo pā.emālī huī hai merī
ki jis se milne kī aarzū thī usī kī furqat meñ aa basā huuñ

na maiñ badlā na vo badle na dil kī aarzū badlī
maiñ kyuuñ kar e'tibār-e-inqalāb-e-nā-tavāñ kar luuñ

yaqīn kar jo tirī aarzū meñ thā pahle
vo lutf tere sivā bhī nahīñ rahā ab to

aarzū dost kī bekār hai ġhurbat meñ 'rashīd'
aap ko hālat-e-yārān-e-vatan yaad nahīñ

junūñ kā paas vafā kā ḳhayāl husn kā ġham
ka.ī charāġh jale ek aarzū ke liye

tulū-e-mahr shagufta sahar siyāhī-e-shab
tirī talab tujhe paane kī aarzū tirā ġham

baras gayā ba-ḳharābāt-e-ārzū tirā ġham
qadah qadah tirī yādeñ subū subū tirā ġham

bisāt-e-ārzū tasvīr-e-sahrā ho ga.ī āḳhir
vo hañgāmoñ kī bastī ho kī duniyā ho ga.ī āḳhir

marg-e-dushman kī aarzū hī sahī
dil se nikle kisī tarah to ġhubār

aarzū terī barqarār rahe
dil kā kyā hai rahā rahā na rahā

ḳhvāhish se kab hai terī talab aarzū se hai
ik samt se nahīñ ye ġhazab chār-sū se hai