Tags-Aarzoo

ik aarzū hai aap mire ham-safar baneñ
tā-umr dekhtī rahūñ ye shauq-e-dīd hai

pesh-e-nigāh-e-muztarib hāsil-e-justujū bhī hai
ya.anī vo shoḳh mā.il-e-pursish-e-ārzū bhī hai

zindagī ġhamgīn hotī jā rahī hai
aarzū rañgīn hotī jā rahī hai

kabhī paas aa ke nigāh kar hai ye zindagī tirā aa.ina
tirā ruup ham tirā pyaar ham tirī aarzū kā siñgār ham

ġham-e-zindagī se shikast kyā rah-e-ārzū meñ qadam baḌhā
tū jo saath ho to badal bhī deñ ye mizāj-e-lail-o-nahār ham

tujhe pā sakeñ ki na pā sakeñ koī zindagī kī lagan to hai
ki ḳhushī se kaise ujaaḌ deñ tirī aarzū kā dayār ham

kabhī naġhma-e-ġham-e-ārzū kabhī zindagī kī pukār ham
kabhī ḳhāk-e-kūcha-e-yār ham kabhī shahryār-e-bahār ham

tirī nigāh-e-tajassus bhī pā nahīñ saktī
us aarzū ko jo dil meñ kahīñ chhupī hogī

fareb-e-ārzū pe aur e'tibār ke liye
uThāo jaam vaqt kam hai vaqt ho chukā bahut

kisī bahr-e-muhīt-e-be-karāñ kī aarzū meñ hai
ye tūfānoñ kī maujoñ meñ sañvarne kā hunar terā

charāġh-e-ārzū kī lau bhaḌakne de abhī 'farhat'
vahī tanhā shab-e-furqat meñ hogā ham-safar terā

miT nahīñ saktā qayāmat tak nishān-e-ārzū
husn jism-e-ārzū hai ishq jān-e-ārzū

un kī duzdīda nigāhoñ meñ ye kyā e.ajāz thā
jī uThe ek-bārgī sab kushtagān-e-ārzū

ho chukī roz-e-azal vābastagī-e-huns-o-ishq
ek jān-e-ārzū hai ik jahān-e-ārzū

be-qarārī be-ḳhudī bechārgī dīvāngī
haiñ ye unvānāt-e-zeb-e-dāstān-e-ārzū

be-ḳhudī kī manziloñ meñ sarf-e-hairat ho gayā
dil ki le de kar bachā thā ik nishān-e-ārzū

zindagī mere liye 'tālib' sazā-e-ishq hai
merī hastī hai mujassam dāstān-e-ārzū

vo suneñ siine se lag kar dāstān-e-ārzū
dil kī har āvāz hotī hai zabān-e-ārzū

ho chale un ke lab-e-nāzuk tabassum-āshnā
barq se kab tak bachegā āshiyān-e-ārzū

dhaḌkanoñ kī baat mānūñ yā ki ā.īñe kī ab?
aarzū kī apnī zid hai jhurriyoñ kī apnī zid