Tags-Aarzoo

ai merī āñkho ye be-sūd justujū kaisī
jo ḳhvāb ḳhvāb rahīñ un kī aarzū kaisī

ek phuul kā chaman meñ talabgār maiñ huā
vo phuul khil rahā thā sar-e-shāḳh aarzū

na.e mausamoñ kī huuñ aarzū na.ī rif.atoñ kī huuñ justujū
mujhe toḌ ḳhvāb-e-jahān-e-nau maiñ tilism-e-bāb-e-ḳhayāl huuñ

maiñ bhiig bhiig gayā aarzū kī bārish meñ
vo aks aks meñ taqsīm chashm-e-tar se huā

tujh se milne kī aarzū hai tabhī
raah meñ mere yaar baiThā huuñ

marg-e-dushman kī aarzū hī sahī
dil se nikle kisī tarah to ġhubār

karnī hai tark jis jagah terī talāsh-o-ārzū
sahrā meñ ab maqām vo mere ġhazāl aa gayā

ham chale rehn-e-ārzū ho kar
dil-e-be-mudda.ā ḳhudā-hāfiz

ai mirī jān-e-ārzū māne-e-iltifāt kyā
hogā na vaqf-e-dil kabhī kaif-e-tabassumāt kyā

talab kī aag kisī shola-rū se raushan hai
ḳhayāl ho ki nazar aarzū se raushan hai

visāl-e-yār to mumkin nahīñ magar nāseh
ruḳh-e-hayāt isī aarzū se raushan hai

muddatoñ se aarzū ye dil meñ hai
ek din tū ghar hamāre aa.iye

phir koī ḳhvāb dekhūñ koī aarzū karūñ
ab ai dil-e-tabāh tirā kyā ḳhayāl hai

ye dil ab rakh diyā hai vaqt kī Thokar pe ai 'sīmā'
ki is kambaḳht dil kī aarzū hī kam nahīñ hotī

mare ham aarzū un kī bar aa.e
hamārā hausla kyā ḳhaak niklā

shikast-e-ārzū arz-e-tamannā shauq-e-lā-hāsil
tirī ḳhātir to ye sab kuchh gavārā kar rahā huuñ maiñ

fareb-e-ārzū hī zindagī hai
sarāboñ meñ safar be-kār karnā

kahāñ haiñ vo aarzū ke chashme talab ke vo maujzan samundar
nazar ne āndhe kueñ banā.e haiñ fikr ne khā.iyāñ likhī haiñ

adab kī shaan banūñ aarzū ye hai 'zaryāb'
magar ye kyā mirī hasrat nikal bhī saktī hai

ye ishq kyā hai ki iz.hār-e-ārzū ke liye
harīf nauhagaroñ ko talāsh karte haiñ