Tags-Aarzoo

kal tak samajh rahā thā jise jān-e-ārzū
is husn-e-intiḳhāb meñ ab kyā hai kuchh nahīñ

apnī to aarzū hai na marzī na hī pasand
tū jis jagah biThā de vahī hai mirī jagah

log jām-o-subū meñ kho.e rahe
ham tirī aarzū meñ kho.e rahe

shikārī aa.e the dil meñ shikār-e-ārzū karne
magar is dasht meñ to ek aahū bhī nahīñ niklā

charḳh se kuchh umiid thī hī nahīñ
aarzū maiñ ne koī kī hī nahīñ

qaa.em isī tazād ke dam se hai kā.enāt
maiñ aarzū huuñ jis kī mirī aarzū na ho

vafā kī manziloñ ko ham ne is tarah sajā liyā
qadam qadam pe ik charāġh-e-ārzū jalā liyā

aisī yaḳh-basta havā meñ koñpleñ phūTeñgī kyaa?
bārishoñ kī aarzū be-barg shāḳheñ kyā kareñ

ab maiñ huuñ aur mātam-e-yak-shahr-ārazū
toḌā jo tū ne aa.ina timsāl-dār thā

be-qarārī meñ bhī akasr dard-mandān-e-junūñ
ai fareb-e-ārzū tere sahāre so ga.e

ye mish.al-e-ḳhvāb bhī na 'sājid' kisī sitāre kī pesh-rau ho
ki mere siine meñ ek ġham ne numūd paa.ī hai aarzū se

ye dasht-e-ārzū hai yahāñ ek ek dil
tujh ko ḳhabar bhī hai tire saudā.iyoñ meñ hai

kyā pūchhte ho maqsad-e-iz.hār-e-ārzū
sharh-e-vafā pe naqd-o-nazar chāhtā huuñ maiñ

ḳhairiyat dil kī pūchhne vaale
chain se terī aarzū hai abhī

dil pashemān-e-justujū hai abhī
khoī khoī sī aarzū hai abhī

āḳhir vo aarzū mere sar par savār thī
laa.e the jis ko ḳhāk-ba-sar mere sāmne

chitā bujhā de koī koī asthiyāñ bahā de
maiñ aarzū meñ sahar kī sadiyoñ se jal rahā huuñ

ishq hai muntahā-e-mahviyyat
aarzū kī bhī aarzū na rahe

toḌ kar hī aarzū pahuñchī kahīñ pāyān-e-kār
ghup-añdhere meñ koī band-e-qabā dekhā huā

ba-juz havāla-e-sad-zaḳhm-e-be-nishāñ kyā hai
ik aarzū ki jo dil se nikāl bāhar kī