Tags-Aadmi

ek pal kī ḳhushī ke liye
aadmī roz martā rahā

jamhūriyat kī laash pe tāqat hai ḳhanda-zan
is barahna nizām meñ har aadmī kī ḳhair

ārzūoñ kī maalā pirone se haiñ ye zamīñ āsmāñ mere hone se haiñ
mujh pe bhī kuchh kaho aadmī ne kahā aadmī ke liye ek taaza ġhazal

jo mujh meñ baiThā uḌātā rahtā hai niiñd merī
mujhe ab us aadmī ko bāhar nikālnā hai

maiñ jis ko apnī gavāhī meñ le ke aayā huuñ
ajab nahīñ ki vahī aadmī adū kā bhī ho

būñdeñ paḌī thiiñ chhat pe ki sab log uTh ga.e
qudrat ke aadmī se ajab silsile rahe

ḳhudā bachā.e tirī mast mast āñkhoñ se
farishta ho to bahak jaa.e aadmī kyā hai

duniyā ke saath diin kī begār al-amāñ
insān aadmī na huā jānvar huā

tum meñ to kuchh bhī vāhiyāt nahīñ
jaao tum aadmī kī zaat nahīñ

jo bhī denā hai vo ḳhudā degā
aadmī aadmī ko kyā degā

har aadmī ke dil meñ ghar kar rahī hai 'shātir'
mahbūb mehrbāñ hai urdu zabāñ hamārī

zindagī āzād pahle yuuñ kabhī tanhā na thī
aadmī bahtā thā yūñhī vaqt kī raftār par

ham jo ab aadmī haiñ pahle kabhī
jaam hoñge chhalak ga.e hoñge

zindagī is qadar kaThin kyuuñ hai
aadmī kī bhalā ḳhatā kyā hai

samjhā rahe ho mujh ko mirā irtiqā magar
dekhā nahīñ hai aadmī pahlā banā huā

ehtirām-e-ādmī ehsās-e-ġham marg-e-anā
aaj kis kis zaḳhm ko karte rafū maiñ aur tū

aage nikal ga.e vo mujhe dekhte hue
jaise maiñ aadmī na huā naqsh-e-pā huā

ishq ne 'ġhālib' nikammā kar diyā
varna ham bhī aadmī the kaam ke

bāhar hī chhoḌ aa.e vo chehra jo ḳhaas thā
ik aam aadmī kī tarah ghar meñ rah ga.e

aadmī honā ḳhudā hone se behtar kaam hai
ḳhud hī ḳhud ke ḳhvāb kī ta.abīr ban kar dekh le