Tags-Aadmi

shabāb naam hai us jāñ-navāz lamhe kā
jab aadmī ko ye mahsūs ho javāñ huuñ maiñ

nikhat-o-shādābī-e-gul hai chaman kā imtiyāz
aadmī pahchānā jaatā hai faqat kirdār se

vāpsī hogī vahīñ par is kā andāza na thā
nāchtā nañgā chalā thā aadmī jab ġhaar se

darāzi-e-qad se aadmī ko nasīb hotī nahīñ bulandī
tujhe fareb-e-farāz degī ye kajkulāh-e-tavīl kab tak

nizām-e-zar meñ kisī aur kaam kā kyā ho
bas aadmī hai kamāne kā aur khāne kā

khīñch laate haiñ haqīqat meñ havādis varna
aadmī ḳhvāb ke mehvar se nikalne kā nahīñ

pattharoñ ke des meñ shīshe kā hai apnā vaqār
devtā apnī jagah aur aadmī apnī jagah

TuuT kar ruuh meñ shīshoñ kī tarah chubhte haiñ
phir bhī har aadmī ḳhvāboñ kā tamannā.ī hai

is ḳharābāt kā yahī hai maza
ki rahe aadmī mudām ḳharāb

is zamāne se koī tavaqqo na rakh kis meñ himmat hai ḳhanjar pe rakh de zabāñ
adl-gāhoñ meñ insāf bikne lagā sach bhī kahnā hai jurm aadmī ke liye

aadmī kī havas kā Thikānā nahīñ lekin 'anjum' ḳhudā se yahī māñgnā
ik vafādār biivī ho bachche hoñ ghar aur kyā chāhiye zindagī ke liye

sochtā rahtā huuñ takmīl-e-vafā kaise ho
aadmī bhī vo nahīñ hai to ḳhudā kaise ho

vajūd-e-zindagī ik khel hai do-chār lamhoñ kā
haqīqat aadmī se us kī pahchānī nahīñ jaatī

vo sail-e-nūr hai ḳhīra hai aadmī kī nazar
ba-sad ġhurūr-o-adā ḳhanda-zan hai gardūñ par

likh lo ye merī raa.e kyā kyā sitam na Dhaa.e
kal dil ne aadmī par aaj aadmī ne dil par

ghar kī ghuTan se duur nikal jaa.e aadmī
saḌkoñ pe ḳhauf ho na agar hādsāt kā

ghustā chalā hai peT meñ har aadmī kā sar
tujh se bhī ho sakegā na inkār dekh le

qaid-e-ḳhudī meñ aadmī insāñ na ho sakā
zarra simaT gayā to bayābāñ na ho sakā

kis se pūchhūñ irtiqā kī kaun sī manzil hai ye
aadmī ḳhud aadmī kā dushman-e-jāñ ho gayā

sarsarī andāz se dekhoge to mahfil hī mahfil
ġhaur se dekhoge to har aadmī tanhā lagegā