Tags-Aah

kab tak tazallum aah bhalā marg ke ta.iiñ
kuchh pesh aayā vāqi.a rahmat ko kyā huā

ġhair ke pahlū meñ ai 'sho.ala' nahīñ un ko qarār
hai asar itnā hamārī āh-e-pur-tāsīr kā

ġhair jab kahtā hai us par maiñ bhī martā huuñ tab aah
vo to kyā martā hai bas ġhairat se mar jaatā huuñ maiñ

dil meñ jab tak aah thī ik baat thī
lab tak aate hī hikāyat ho ga.ī

ham dil-afroḳhta vaañ juuñ sharar-e-sañg haiñ aah
na jahāñ paik-e-sabā kā bhī guzār aa.e nazar

ye āh-o-fuġhāñ kyuuñ hai dil-e-zār ke aage
kahte haiñ ki rote nahīñ bīmār ke aage

ġhair jhalte haiñ ab unheñ pañkhā
asar-e-āh-e-pur-sharar dekho

dīda-e-tar kā ab to 'aḳhgar' ek hī aalam rahtā hai
nāla-e-shab se āh-e-sahar tak āh-e-sahar se aage bhī

dil se duā nikle to yaqīnan bāb-e-asar tak pahuñchegī
aah jo nikle dil se to pahuñche bāb-e-asar se aage bhī

mat baiTh vaqt-e-naz.a tū yaañ ai hasīñ bahut
ulfat na kar tū aah dam-e-vāpsīñ bahut

na kisī aah kī āvāz na zanjīr kā shor
aaj kyā ho gayā zindāñ meñ ki zindāñ chup hai

jo ġham kī aañch meñ pighlā kiyā aur aah na kī
vo aadmī to nahīñ koī devtā hogā

garmi-e-mohabbat meñ vo haiñ aah se māne.a
pañkhā nafas-e-sard kā jhalne nahīñ dete

kyā kare aah vo bechāra musāfir jis par
aap kī rāh-guzāroñ ko hañsī aatī hai

hijr meñ jaan nikaltī nahīñ aah
ye bhī armān hai kyā mushkil hai

zabt kartā huuñ to ghuTtā hai qafas meñ mirā dam
aah kartā huuñ to sayyād ḳhafā hotā hai

duā kā TuuTā huā harf sard aah meñ hai
tirī judā.ī kā manzar abhī nigāh meñ hai

khul hī gayā tilism-e-dost ain visāl meñ ki thī
ik shab-e-hijr zindagī lazzat-e-āh ke liye

ġham tirā dil se koī nikle hai
aah har-chand maiñ nikāl rahā