Tags-Deedar

tumhārī hasrat-e-dīdār barqarār rahe
hazār saal bhī guzrīñ to kuchh hisāb nahīñ

naqāb-e-ruḳh uThā.ī kis liye itnā to farmā deñ
agar taqdīr meñ hai kushta-e-dīdār ho jaanā

tere chehre par nazar aate haiñ apne hī nuqūsh
hai mirā dīdār bhī shāmil tire dīdār meñ

anvār-e-mohammad ke haiñ anvār-e-ilāhī
dīdār mohammad kā hai dīdār ḳhudā kā

ab is ko diid kaheñ yā ise kaheñ dīdār
hamāre aage se jo ham haTā diye ga.e haiñ

ajiib lamha vo dīdār-e-husn-e-yār kā thā
us ek pal kī tajallī meñ ye khulā ki maiñ huuñ

mahv-e-dīdār hue ham to kisī kī na sunī
nuur āñkhoñ meñ jo aayā to ga.e kānoñ se

parde hazār hoveñ haa.il pa husn us kā
detā hai tāliboñ ko dīdār sab taraf se

ma.ashūq kā nazāra mayassar ho yā na ho
āshiq hamesha tālib-e-dīdār hī bhalā

nairañg husn-e-dost se kar āñkheñ āshnā
mumkin nahīñ vagarna ho dīdār ek tarah

maanā ki faqat mauhūm sahī milne kī hameñ ik aas to hai
dīdār to ho le dīda-e-tar bahnā ho agar tab bah jaanā

kitāb-e-ruḳh hai hijāb-e-taqdīs-e-husn-e-jānāñ
ye raaz kaisā mazāq-e-dīdār par khilā hai

ik aur bhī hasrat hai pas-e-hasrat-e-dīdār
ik aur bhī āġhāz hai anjām ke aage

guzregī kyā jamāl-e-ruḳh-e-yār dekh kar
hairat hai husn hasrat-e-dīdār dekh kar

ḳhumār hasrat-e-dīdār meñ rahūñ har dam
savād-e-ishq yūñhī terī shiddatoñ meñ rahūñ

shauq-e-dīdār dil meñ hai 'darshan'
aa bhī jaa.e ḳhudā kare koī

faqat kaTne ko yuuñ bhī kaT rahī hai zindagī lekin
vahī hai zindagī jis pal tirā dīdār hotā hai

miT ga.ī hasrat-e-dīdār bhī rafta rafta
hijr meñ hasrat-e-dīdār kahāñ tak jaatī

tā-umr na milne kī kasak saath rahegī
pahlā to nahīñ āḳhirī dīdār mirī jaañ

diid ke tālib the muusā tuur ko thī kyā ḳhabar
phūñk kar rakh degī bijlī jalva-e-dīdār kī