Tags-Deedar

muuñd le jab tū in ā.ankhoñ ko jahāñ se tū 'hasan'
dil kī ā.ankhoñ se tujhe yaar kā dīdār mile

shauq merā tālib-e-dīdār ho jaatā agar
dekhtā 'mūsā' mujhe siinā mujhe jalva mujhe

dīdār kī gursañgī apnī yahīñ se dekh
ik hī nigāh yāroñ kī auqāt ho ga.ī

kyuuñ jal gayā na tāb-e-ruḳh-e-yār dekh kar
jaltā huuñ apnī tāqat-e-dīdār dekh kar

kabhī zikr-e-dīdār aayā to bole
qayāmat se bhī pesh-tar dekh lenā

dīdār ke bhūke tere jo haiñ hai ḳhatm unhīñ par nafs-kushī
kuchh ḳhvāhish-o-fikr-e-faut nahīñ duniyā ke maze se kaam nahīñ

dīdār ḳhvāh us ke kam hoñ to shor kam ho
har sub.h ik qayāmat uThtī hai us ke dar se

buto shauq-e-dīdār se sar na chaḌhnā
nazārā kisī kā tamāshā tumhārā

ham ne dekhā hai mohabbat kā sazā ho jaanā
sub.h-e-dīdār kā bhī shaam milā ho jaanā

dīda-o-dil ko dikhāyā chāhiye dīdār-e-yār
husn ke aalam se ā.īnoñ ko mahram kījiye

apne maazī ko charāġhoñ meñ basar ham ne kiyā
kaT ga.ī raat to dīdār-e-sahar ham ne kiyā

hai dil ko is tarah se mire yaar kī talāsh
jis tarah thī kalīm ko dīdār kī talāsh

kisī kā vāda-e-dīdār to ai 'dāġh' bar-haq hai
magar ye dekhiye dil-shād us din ham bhī hote haiñ

shaam gul hotī chalī jaatī hai rafta rafta
sham-e-gul jaltī nahīñ gulshan-e-dīdār meñ ab

taqdīr usī kī hai nasība hai isī kā
jis aañkh se kuchh va.ada-e-dīdār hai terā

ulfat ke na.e dīvānoñ ko kis tarah se koī samjhā.e
nazroñ pe lagī hai pābandī dīdār kī bāteñ karte haiñ

dīdār kā to va.ada mahshar meñ dekh kar kar
bīmār ġham meñ tere tab tak to kyā rahegā

jab talak talḳhī-e-shorāba-e-ġham chākhā niiñ
tab talak lazzat-e-dīdār kuuñ kui kyā jaane

dīdār se pahle hī kyā haal huā dil kā
kyā hogā jo ulTeñge vo ruḳh se naqāb āḳhir

amīr-e-shahr to ḳhud zard-rū thā ek muddat se
jharoke se vo ahl-e-shahr ko dīdār kyā detā