Tags-Deedar

mat pūchh us kā tālib-e-dīdār kaun hai
ye dekh mohr-bar-lab-e-guftār kaun hai

ik tamāshā vo bhī dīdār ke qābil na huā
raqs-e-bismil jo sar-e-kūcha-e-qātil na huā

shauq-e-dīdār kī tezī se maiñ aksar har sub.h
kūcha-e-yār meñ jaatā huuñ sabā se pahle

kāsa-e-sar ko liye māñgtā dīdār phire
'mīr' vo jaan se bezār gadā maiñ hī huuñ

qadam qadam par sanam-kada hai nazar nazar meñ haram kā manzar
tajalliyāñ hī to haiñ ye āḳhir ba-qaid-e-dīdār-e-yār kab tak

lan-tarānī kī jo tākīd hai ai dil ye khulā
bāb-e-dīdār meñ manzūr-e-nazar kuchh bhī nahīñ

ummīd-e-jalva-e-dīdār bād-e-marg kahāñ
bharī hai yaas ne ḳhāk-e-mazār āñkhoñ meñ

taqsīr kyā hai hasrat-e-dīdār hī to hai
pādāsh us kī husn kā pindār hī to hai

matlūb ho tum dil hai talabgār tumhārā
ye aa.ina hai tishna-e-dīdār tumhārā

kasrtat-e-dīdār se un kī nigāheñ jhuk ga.iiñ
aks mizhgāñ kā naqāb-e-rū-e-zebā ho gayā

sunā to hai terā dīdār ek din hogā
isī ummīd pe baiThe haiñ intizār nasīb

koī to ek nazar ke liye tarastā hai
kisī ko hotā hai dīdār baar baar nasīb

āñkheñ buland hote hī mahdūd ho ga.iiñ
nazreñ jhukā ke dekhā to dīdār ho gayā

lazzat-e-hijr kabhī ishrat-e-dīdār kabhī
aarzū ne bhī tabī.at ko diye dam kyā kyā

sau baar aa.e ġhash arinī hī kahūñgā maiñ
muusā nahīñ ki phir ho na dīdār kī havas

raah chalte huī hai daulat-e-dīdār nasīb
is meñ ehsān nahīñ aap ke darbānoñ kā

ummid-vār-e-vāda-e-dīdār mar chale
aate hī aate yaaro qayāmat ko kyā huā

dekheñ na kisī ko ham phir dekh ke ruḳh terā
dīdār tirā kar ke mar jaa.eñ to achchhā ho

mar kar bhī dikhā deñge tire chāhne vaale
haiñ tālib-e-dīdār fanā se nahīñ Darte