Tags-Dhoka

tumhāre qaul-o-qasam par fareb kyā khātā
tumhārā tarz-e-amal bhī mirī nigāh meñ thā

hurūf-e-makr tire lab pe the magar zālim
mujhe fareb bhī khānā vafā kī raah meñ thā

ham sāda-dil the aa ga.e āḳhir fareb meñ
bātoñ meñ us kī aañkh lagā le ga.ī hameñ

fariyād ai tasavvur-e-abrū-e-dil-fareb
qible kī samt bhuul gayā huuñ namāz meñ

phir aarzū ke khañDar rañg-o-bū meñ Duub chale
fareb-ḳhurda koī ḳhvāb dekhtā hogā

tirā kaam sair-e-mudām hai na ki gulsitānoñ meñ Thaharnā
ye kalī kalī ke fareb meñ tū kahāñ se bād-e-sahar paḌī

hastī fareb-nāma-e-mauj-e-sarāb hai
yak umr nāz-e-shoḳhi-e-unvāñ uThā.iye

yuuñ to diye fareb kisī aur ne unheñ
lekin gunāhgār mirī zaat ho ga.ī

fareb-ḳhurda nazar ko fareb duuñ kab tak
vo ek abr thā kyā aayā aur kyā Thahrā

yuuñ to diye fareb sahāroñ ne umr bhar
dil ko baḌā sukūñ thā sahāroñ kī god meñ

fazā.eñ kuchh bhī nahīñ haiñ faqat nazar kā fareb
khaḌā huā hai koī āsmān thāme hue

'zauqī' galī galī meñ haiñ takiye fareb ke
aġhrāz kī sadā hai qalandar meñ kuchh nahīñ

kuchh fareb-e-rañg-o-bū meñ aa hī jaatā hai bashar
varna ye duniyā nahīñ hai dil lagāne ke liye

sabz qabā-e-chaman sirf fareb-e-nazar
aas kī koñpal kisī shāḳh-e-shajar meñ nahīñ

ye kyā fareb hai ki jo farmā rahe ho tum
maiñ ḳhud ko DhūñDhtā huuñ mile jā rahe ho tum

jo sambhal sambhal ke bahak ga.e vo fareb-ḳhurda-e-rāh the
vo maqām-e-ishq ko pā ga.e jo bahak bahak ke sambhal ga.e

yuuñ dījiye fareb-e-mohabbat ki umr bhar
maiñ zindagī ko yaad karūñ zindagī mujhe

derīna ḳhvāhishoñ se sajāyā gayā mujhe
maqtal meñ kis fareb se laayā gayā mujhe

us husn-e-kārobār ko mastoñ se pūchhiye
jis ko fareb-e-hosh ne isyāñ banā diyā