Tags-Dhoka

ġhalat ġhalat ki mohabbat fareb-e-hastī hai
ye rabt-e-ḳhās asar ke sivā kuchh aur nahīñ

bāhar bahut hī gard hai dhoke fareb kī
yuuñ pairahan badal ke hī ghar aa.iye zarā

mujhe 'shor' de rahe haiñ vo fareb-e-tez-gāmī
ki jo do qadam bhī chalte to na e'tibār hotā

fareb-e-qurb to dekho ki mere pahlū meñ
tamām raat koī karvaTeñ badaltā hai

ye jahān dām-e-fareb hai jo chale to dekh ke chal zarā
jo tujhe ḳhayāl ho diid kā to samajh ke aañkh yahāñ uThā

ba-haqq-e-āñ mah ki roz-e-mahshar ba-dād maarā fareb 'ḳhusrav'
sapīt man ke durā.e rākhūñ jo jaa.e pā.ūñ piyā kī khatiyāñ

sar-chashma-e-sarāb fareb-e-majāz hai
kyā e'tibār zindagī-e-musta.ār kā

har-sū dikhā.ī dete haiñ vo jalva-gar mujhe
kyā kyā fareb detī hai merī nazar mujhe

maiñ apne-āp ko auroñ meñ rakh ke dekhtā huuñ
kahīñ fareb na hoñ dard-mandiyāñ merī

khultā nahīñ 'hamesh' par uqda-e-fareb kyuuñ
kis ne bichhā.e haiñ yahāñ dāna-o-dām al-amāñ

na de mujh ko fareb-e-ishq duniyā
fareb-e-zindagī kuchh kam nahīñ hai

dūsroñ ko fareb de de kar
ham ne ḳhud bhī fareb khāyā hai

bahut se ishrat-e-nau-roz-o-īd meñ haiñ magan
bahut vo haiñ jo fareb-e-umīd meñ haiñ magan

mire ḳhulūs ko samjhā gayā hai nādānī
fareb sāmne khāyā munāfiqat kyā hai

'asar' ab tak fareb khātā hai
terī bātoñ ko maan jaatā hai

ye dil shahīd-e-fareb-nigāh ho na sakā
vo laakh ham se ba-andāz-e-mahramāna milā

qadam qadam pe hazāroñ fareb haiñ saaqī
irāde nek to bāñdhe haiñ bāda-ḳhvāroñ ne

savāl ye hai ki is pur-fareb duniyā meñ
ḳhudā ke naam pe kis kis kā ehtirām kareñ

maiñ jāntā huuñ magar mujhe us fareb meñ lutf aa rahā hai
sarāb hai vo jise mirī tishnagī ne dariyā banā diyā hai

har ik chehre pe aa.e jab nazar ik dūsrā chehra
fareb-e-rañg-o-bū insān aksar khā hī jaatā hai