Tags-Dhoka

jab bhī koī fareb diyā ahl-e-dahr ne
ham ik nazar-shanās koī chaal chal ga.e

safar meñ dhuup kī shiddat ne bhī satāyā magar
fareb dete rahe kis qadar sarāb na pūchh

kitnā fareb-kār hai ehsās-e-bandagī
ham manzil-e-ḳhudī se bahut duur aa ga.e

thā bahut saffāk tansīḳh-e-ta.alluq kā fareb
us kā aalam hai jise apnā jahāñ samjhā thā maiñ

maiñ jinheñ fareb samjhūñ tirī yād-e-mehrbāñ ke
vo charāġh bujh ga.e haiñ mirī umr-e-jāvedāñ ke

sab se baḌā fareb hai ḳhud zindagī 'adā'
is hīla-jū ke saath haiñ ham bhī bahāna-sāz

fareb de na kahīñ azm-e-mustaqil merā
hujūm-e-yās se ghabrā na jaa.e dil merā

talḳhī-e-hāl ko hai ishrat-e-fardā kā fareb
dil junūñ-kosh hai aur aql trahdār bhī hai

vo baar baar mujhe mehrbāñ nazar aa.e
mujhe fareb nigāhoñ ne baar baar diyā

fareb khānā na ġham uThānā na un ke saa.e meñ muñh chhupānā
hazār kāñTe chhupā.e baiThe haiñ shoḳh rañgīñ gulāb chehre

fareb-e-dushmanāñ ham khā.eñge kyā
fareb-e-dostāñ khāyā bahut hai

rañg hī se fareb khāte raheñ
ḳhushbueñ āzmānā bhuul ga.e

koī fareb na khaa.e safed-poshī se
na jaane kitne sitāre nigal ga.ī hai sahar

shauq kitne fareb detā hai
muskurā kar hamārā naam na le

ab kyā kaheñ kisī se ye apnī zabāñ se ham
be-zār ho chuke haiñ fareb-e-jahāñ se ham

bahut muhāl thā varna ki dil fareb meñ aa.e
kisī ke ġham se ġham-e-kā.enāt kī chhab hai

kis tajallī kā diyā ham ko fareb
kis dhundalke meñ hameñ pahuñchā ga.e

badal to saktī hai nairañgī-e-fareb-e-sahar
yaqīñ nahīñ magar imkāñ hai dekhiye kyā ho

apnī hī raushnī se nazar khā ga.ī fareb
zarroñ ko āftāb samajhne lagā thā maiñ

chaman meñ dekhtā phirtā huuñ kis ko
fareb-e-rañg-o-bū hai aur maiñ huuñ