Tags-Dhoka

maiñ is fareb-gah meñ vo ādam-gazīda huuñ
DhūñDe hai jo añdheroñ meñ jā-e-panāh ko

aadmī jaan ke khātā hai mohabbat meñ fareb
ḳhud-farebī hī mohabbat kā sila ho jaise

qadam qadam par fareb pag pag nukīle kāñTe
chaman tak aane kī ab vo āsāniyāñ kahāñ haiñ

bahlā rahā huuñ dil ko fareb-e-ḳhayāl se
ummīd-e-ġham-gusārī-e-yārāñ kiye hue

jalse ujaḌ ga.e the kisī ḳhud-fareb ke
ḳhud hī bajā rahā thā vo taalī koī na thā

fareb khaa.e haiñ ham ne fareb khāte haiñ
fareb de na sake ham magar zamāne ko

tamām umr kaTī ik fareb meñ 'azmī'
bikher kar vo gayā duur tak sarāb ke biij

bos-o-kanār ke liye ye sab fareb haiñ
iz.hār-e-pāk-bāzī o zauq-e-nazar ġhalat

apne ġham se kashīd kar ke hañsī
ḳhud hī apnā fareb khāte the

churā ke le ga.ī duniyā-e-pur-fareb us ko
aur apnī saada tabī.at meñ rah ga.e haiñ ham

sab dilāse us ke jhūTe us ke sab vaade fareb
kab tak āḳhir ham raheñ sabr-o-razā oḌhe hue

kaid ho hirs-o-havas ho yā fareb-o-makr ho
aap hī ke haath rahtā hai har ik maidān shaiḳh

ye aql vaale isī tarah se hameñ fareb-e-kamāl deñge
junūñ ke dāman se phuul chun kar ḳhirad ke dāman meñ Daal deñge

bach nikalnā fareb-e-hastī se
bas isī ko najāt kahte haiñ

khulā āḳhir fareb-e-mai chalā jab dard kā sāġhar
bañdhā zor-e-ḳhumār andesha-e-roz-e-jazā ho kar

nahīñ hai shikva koī dushmanoñ se ai 'barqī'
fareb dost se khāyā to aañkh bhar aa.ī

ye kis ke izn-o-razā se bahak rahe haiñ badan
fareb-rañg na de paayā ye jahāñ mujh ko

fareb de ke taġhāful vabāl-e-jāñ hotā
jo ik latīf tabassum na darmiyāñ hotā

milā fareb-o-makr se bhī kab vo hiila jo magar
libās sādgī kā dāġh-dār kar liyā gayā

khā ga.e nargis-e-shahlā kā fareb
ki un āñkhoñ meñ muravvat hogī