Tags-Dhoka

bos-o-kanār ke liye ye sab fareb haiñ
izhār-e-pāk-bāzī-o-zauq-e-nazar ġhalat

zamāna jab kabhī āmāda-e-fareb huā
kisī ne parda uThāyā hai āgahī ke liye

chalo is asnā meñ merī āñkheñ to khul ga.ī haiñ
kabhī jo us ne mujhe fareb-e-nazar diyā thā

fareb-e-vāda-e-fardā kā zikr kyā kiije
vo mo'atabar hī the kab jin kā e'tibār uThā

hargiz fareb-e-rañg-e-masarrat na khā.iye
ye ġham kā naam hai ye haqīqī ḳhushī nahīñ

bahut fareb se ham vahshiyoñ ko vahshat hai
hamāre dasht meñ 'nāsiḳh' kahīñ sarāb nahīñ

jin kā maqsad fareb hotā hai
vo baḌī sādgī se milte haiñ

na kar ḳhudā ke liye baar baar zikr-e-bahisht
ham āsmāñ kā mukarrar fareb kyuuñ khā.eñ

kaam apnā kar chukī bīmārī-e-ishq-e-butāñ
maiñ fareb-e-nusḳha-o-tāsīr-e-darmāñ meñ rahā

jab Dūbnā hī tai hai ubharnā muhāl hai
daldal hai dil fareb utar hī na jā.iye

kuchh aur tujh pe khuleñgī haqīqateñ 'jālib'
jo ho sake to kisī kā fareb bhī khā le

vahī fareb-e-dushmanāñ hai is kā ġham nahīñ hameñ
hameñ to ġham ye hai ḳhulūs-e-dostāñ badal gayā

vo un kī dil-fareb dil-ārā.iyāñ kahāñ
maazī ke ḳhauf-zār meñ ab kho rahā hai kyuuñ

tirī ḳhātir jo merī ḳhud-fareb āñkhoñ ne dekhe the
unhīñ TuuTe hue ḳhvāboñ kā nauhagar rahā huuñ maiñ

allāh re fareb-e-nazar-e-chashm-e-fusūñ-sāz
banda hai har ik shaiḳh har ik barahman un kā

har raat duā karūñ sahar kī
har sub.h nayā fareb khā.ūñ

fareb-e-mashriq-o-maġhrib haiñ rahravān-e-jadīd
ye bad-nasīb na aaqil hue na dīvāne

tasavvuroñ ke fareb uThā kar mushāhida vahm ban rahā hai
nazar ne khaa.e haiñ itne dhoke ki dekh kar bhī yaqīñ nahīñ hai

tilism-ḳhāna-e-sad-rañg-o-bū meñ ai 'sāġhar'
fareb-e-shola-o-shabnam faroḳht hotā hai

fareb-ḳhurda tabassum ḳharīdne ke liye
vaqār-e-dīda-e-pur-nam faroḳht hotā hai