Tags-Dhoka

kahā thā us ne mohabbat fareb hai dil kā
vo jab bhī duur gayā harf harf sach niklā

maiñ farefta tere naaz par maiñ nisār tere niyāz par
tirī har adā meñ fareb thā mujhe jis kī be-ḳhabarī rahī

khā rahā huuñ fareb-e-āzādī
dekh kar paañv kī na.ī zanjīr

kisī kā lahja yaqīnan fareb lagtā thā
magar fareb ke pīchhe sadāqateñ thiiñ bahut

phir jī meñ hai ki khā.iye koī nayā fareb
phir aa rahī hai ik but-e-va.ada-shikan kī yaad

kis darja dil-fareb haiñ jhoñke umiid ke
ye zindagī huī hai gavārā kabhī kabhī

tujh ko 'nasīm' kyā huā dīd-e-jahāñ se dil uThā
rañg-e-fareb jā-ba-jā har gul-e-bostāñ meñ hai

kaam tere daġhā fareb ke kaam
bāteñ īmān-dār kī bāteñ

hisār-e-zāt meñ mahbūs ho ke ahl-e-havas
fareb-e-hāsil-e-be-mudda.ā meñ rahte haiñ

vo hañs hañs ke vaade kiye jā rahe haiñ
fareb-e-tamannā diye jā rahe haiñ

fareb-e-nau ke bhañvar meñ utārtā hai mujhe
ye kaun pichhle pahar phir pukārtā hai mujhe

tū apne pindār kī ḳhabar le ki ruḳh havā kā badal rahā hai
tirī nazar se bahakne vaalā fareb khā kar sambhal rahā hai

fareb khāne ko pesha banā liyā ham ne
jab ek baar vafā kā fareb khā baiThe

husn-e-yaktā kī rahzanī tauba
ik fareb-e-navā ne luuT liyā

dete rahe fareb-e-manāzir ke but-kade
dekhā kiye tujhe nigah-e-but-shikan se ham

na iztirāb meñ lazzat na ārzū-e-sukūñ
koī kahe ki maiñ ab kyā fareb khā ke jiyūñ

bajā ki husn kā ehsās hai fareb-e-nazar
magar vo naqsh jo dil meñ hai kab ḳhayālī hai

ye mirā fareb-e-nazar nahīñ mire ham-qadam the yahīñ kahīñ
mujhe āhaTeñ bhī na mil sakīñ vo baḌe jatan se chale ga.e

ye bhī fareb se haiñ kuchh dard āshiqī ke
ham mar ke kyā kareñge kyā kar liyā hai jī ke

ye chamak-damak to fareb hai mujhe dekh gahrī nigāh se
hai libās merā sajā huā mirā dil magar hai bujhā huā