Tags-Dhoka

arsa vo mere ishq kā niklā koī fareb sā
maiñ thā kahāñ vo ḳhud-numā ḳhud hī se pyaar meñ milā

fareb khā.egī har baar merī tishna-labī
badan ke dasht pe jab jab sarāb utreñge

kabhī to rishtoñ ko ḳhuun ke bhī fareb-e-vahm-o-gumān samjhā
kabhī vo narġhe meñ dushmanoñ ke hujūm-e-ahbāb dekhtā hai

kahīñ fareb na nikle pukār dariyā kī
ham aab samjhe haiñ jis ko ġhubār-e-āb na ho

musalsal thā fareb-e-ḳhvāb-gāh-e-ālam-e-fānī
magar sotā rahā chaltī rahī umr-e-ravāñ merī

vahshat ne yuuñ to ḳhuub diyā har qadam pe saath
lekin tire fareb-e-dil-ārā meñ aa ga.e

anā kī naav jahāñ Doltī phire 'mahbūb'
maiñ us fareb ke sailāb se nikal aayā

ubhar rahe haiñ jo manzar fareb-e-manzar haiñ
jo khul rahā hai darīcha to vahm apnā hai

mujhe to ye bhī fareb-e-havās lagtā hai
vagarna kaun añdheroñ meñ saath chaltā hai

pahle mire ḳhulūs ko dete rahe fareb
āḳhir mire ḳhulūs ko badnām kar diyā

dushmanoñ ko qarīb se dekhā
dostoñ ke fareb khaa.e haiñ

aksar nashāt-e-sair-e-gulistān-e-be-ḳhizāñ
andāza-e-fareb-e-bahārāñ kabhī kabhī

rah to ga.ī fareb-e-masīhā kī aabrū
har chand ġham ke māroñ kā chāra na ho sakā

said-e-karishma is liye hote nahīñ ki ham
pahle se zaḳhm-ḳhurda fareb-e-vafā ke haiñ

husn hotā hai kuchh to husn-e-nazar
kuchh fareb-e-nazar bhī hotā hai

fareb-e-husn-e-samā.at tirī duhā.ī hai
haqīqatoñ kī jagah chhīnte haiñ afsāne

huuñ fareb-e-sitam-e-yār kā qaa.il 'akbar'
marte marte na khulā ye ki jafā hotī hai

sarāb hai ki haqīqat nazāra ki fareb
yaqīñ bhī TuuTā hai tarz-e-gumāñ bhī TuuTī hai

husn phir le rahā hai añgḌā.ī
pyaar ko phir fareb khānā hai

jo munkir-e-vafā ho fareb us pe kyā chale
kyuuñ bad-gumāñ huuñ dost se dushman ke baab meñ