Tags-Dhoka

saare rishte jhuuT haiñ saare ta.alluq par fareb
phir bhī sab qaa.em raheñ ye bad-duā kar aa.e haiñ

kahīñ fareb na khānā yahī fidā-e-jām
ba-vaqt-e-kār ajab hoshyār niklegā

ye phuul haiñ mire 'nashtar' jigar ke daaġh nahīñ
fareb-ḳhurda-e-shabnam guhar kī baat na kar

terā fareb-e-va.ada bahut kāmyāb hai
āñkhoñ ko farsh-e-rāh kiye jā rahā huuñ maiñ

ab shikva-e-fareb-e-mohabbat na kījiye
ham bhī kisī kī aañkh ke taare nahīñ rahe

vo aa gayā thā merī giraft-e-vafā meñ par
us par fareb the jo zamānat meñ kaam aa.e

do gaz zamīñ fareb-e-vatan ke liye milī
vaise to āsmāñ bhī bahut haiñ zamīñ bahut

tirī nīm-kash nigāheñ tirā zer-e-lab tabassum
yūñhī ik adā-e-mastī yūñhī ik fareb-e-sāda

har ik ufuq fareb-e-nazar hai ki āsmāñ
jhuk kar gale zamīn ke miltā dikhā.ī de

detā rahā fareb-e-musalsal koī magar
imkān-e-iltifāt se ham khelte rahe

fāsle ke ma.anī kā kyuuñ fareb khāte ho
jitne duur jaate ho utne paas aate ho

judā.iyāñ hoñ to aisī ki umr bhar na mileñ
fareb do to zarā silsile baḌhā ke mujhe

maiñ batā.ūñ vā.iz-e-ḳhush-navā hai jahān-o-ḳhuld meñ farq kyā
ye agar fareb-e-ḳhayāl hai vo fareb-e-husn-e-ḳhayāl hai

shauq ke mumkināt ko donoñ hī aazmā chuke
tum bhī fareb khā chuke ham bhī fareb khā chuke

koī baat us meñ zarūr thī jo mire ḳhayāl meñ rah ga.ī
use kyuuñ fareb-e-nazar kahūñ jise maiñ ne dekhā thā ḳhvāb sā

ham ne is duniyā ke mai-ḳhāne meñ ye dekhā fareb
bas vahī pyāse rahe jo sāhib-e-īmān the

apnī duniyā hai dil-fareb bahut
ek dil ko kahāñ kahāñ rakhnā

ho gayā hosh-rubā husn-e-fareb-e-ālam
nal jo baazī meñ lagā ishq-e-daman bhuul gayā

fareb de hī gayā 'nūr' us nazar kā ḳhulūs
fareb khā hī gayā maiñ subhāv aisā thā

jin ko fareb-e-shauq meñ aanā thā aa chuke
ab to tire karam ko pashīmāñ kareñge ham