Tags-Dhoka

ek naqsh-e-yād-e-yār ik partav-e-husn-e-fareb
merī bazm-ārā.iyoñ kā rāz-dāñ koī to hai

jalva ki fareb-e-jalva thā jo ho tasvīr mukammal thī
ik shor uThā har jānib se pahchān liyā pahchān liyā

parda-e-duniyā meñ ab be-sūd haiñ ye koshisheñ
ai farem-e-āb-o-dāna maiñ tah-e-dām aa gayā

ai mujh ko fareb dene vaale
maiñ tujh pe yaqīn kar chukā huuñ

ḳhizāñ ke saiñkaḌoñ manzar haiñ ai fareb-e-ḳhayāl
tulū-e-sub.h-e-bahārāñ kā e'tibār na kar

vo aur pursish-e-ahl-e-vafā fareb na khā
dil aur tark-e-ġham-e-yār e'tibār na kar

pursish tirī fareb tasallī tirī fareb
vo dil kī baat thī jise duniyā kā Dar kahā

matlab muāmalāt kā kuchh pā gayā huuñ maiñ
hañs kar fareb-e-chashm-e-karam khā gayā huuñ maiñ

nafas nafas meñ agar zauq-e-inqalāb nahīñ
fareb-e-mastī-e-pindār hai shabāb nahīñ

kitnā dilkash fareb-e-hastī hai
zindagī maut ko tarastī hai

jis meñ umīd-o-yās fareb-e-nazar rahī
is haft-ḳhvān-e-ġham kī rivāyāt le chaleñ

māhaul meñ sajā ke añdheroñ kā ik fareb
jugnū ko maiñ ne dekh liyā raushnī meñ kal

'ārif'-husain dhokā sahī apnī zindagī
is zindagī ke ba.ad kī hālat bhī hai fareb

har uzv hai dil-fareb terā
kahiye kise kaun sā hai behtar

na khā sakeñgī nigāheñ mirī fareb sukūñ
ki dhaḌkanoñ hī maiñ paa.ī hai zindagī maiñ ne

zīrakī dām-e-fareb-e-dil hai
hai tahayyur nigarānī merī

dil girā us ke zanaḳhdāñ meñ fareb-e-ḳhat se
chaah ḳhas-posh thā ai vaa.e na sūjhā ham ko

jaane dil kī dhaḌkan meñ kyā fareb hotā hai
tujh se baat karte haiñ ham kabhī kabhī tanhā

koī jaada hai na manzil hai koī
sab fareb-e-rāhī-o-rahbar khulā

duāoñ ko haath uThā rahā huuñ ye ḳhud-farebī mulāhiza ho
fareb-e-taskīn kā burā ho maiñ khā rahā huuñ asar kā dhokā