Tags-Dhoka

taḌāve ke liye hai ḳhvān posh mahr-o-mah nādāñ
fareb-e-charḳh mat khānā kahīñ, ye ḳhvān ḳhālī hai

rañgīnī-e-jamāl fareb-e-ḳhayāl hai
'tālib' vagarna dil meñ tamannā kahāñ rahe

fusūñ-shanās huuñ maiñ rañg-o-bū samajhtā huuñ
fareb-ḳhurda-e-rañgīnī-e-bahār nahīñ

umr bhar duniyā ko samjhātā rahā
ḳhud fareb-e-zindagī khātā rahā

pūchhte haiñ de ke mujh ko dost-dārī kā fareb
'kirshn'-mohan dostoñ se is qadar e'rāz kyuuñ

āgahī kyā hai musalsal ḳhud-farebī kā chalan
raushnī kyā hai fareb mustaqil khāne kā naam

ajiib moḌ thā tark-e-ta.alluqāt kā vo
jab apne-āp se ham ne fareb khāyā thā

vafā kī tash.hīr karne vaalā fareb-gar hai sitam to ye hai
nigāh-e-yārāñ meñ phir bhī vo shaḳhs mo'tabar hai sitam to ye hai

ye pur-fareb sitāre ye bijliyoñ ke charāġh
javāb-e-jalva-e-ḳhurshīd ho nahīñ sakte

ḳhizar kā saath diye jā qadam baḌhā.e jā
fareb khaa.e hue kā fareb khaa.e jā

ab kyā fareb dījiye aur kis ko dījiye
ab kyā fareb khā.iye aur kis se khā.iye

duniyā kā na khā fareb vīrāñ hai ye
rāhat se na dil lagā ki mehmāñ hai ye

yuuñ to bahut haiñ aur bhī ḳhūbān-e-dil-fareb
par jaise pur-fan aap haiñ kam aise shaḳhs haiñ

nigāh-e-bad-gumāñ hai aur maiñ huuñ
fareb-e-āshiyāñ hai aur maiñ huuñ

fareb ġham hī sahī dil ne aarzū kar lī
burā hī kyā hai agar terī justujū kar lī

har dil-fareb chiiz nazar kā ġhubār hai
āñkheñ hasīn hoñ to ḳhizāñ bhī bahār hai

bazm-e-tarab bisāt-e-masarrat fareb haiñ
maiñ aish-e-musta.ār kā qaa.el nahīñ rahā

ḳhizāñ meñ lāla-o-gul kā bharam bhī khul hī jaatā hai
hamesha to fareb-e-gulistāñ baaqī nahīñ rahtā

rāste bhī fareb dete haiñ
jab koī ham-safar nahīñ hotā

fareb-e-ārzū pe aur e'tibār ke liye
uThāo jaam vaqt kam hai vaqt ho chukā bahut