Tags-Dhoka

fareb-e-ḳhvāb mire rāste ko rok nahīñ
ki vaqt-e-shām hai ye ġham-kade ko jaane kā

kis kis bashar ko laa.ī hai duniyā fareb meñ
kyā kyā javāñ murīd hai us pīr-zāl kā

baiThe butoñ kī bazm meñ jin kī hai qadr jab vo log
apne fareb-o-fan se vaañ thā ye ḳharāb-o-ḳhvār bhī

dekhiye kyā ho be-tarah dil kī lage haiñ ghaat meñ
ġhamza-e-pur-fareb bhī ishva-e-sehr-kār bhī

fareb dil ne mohabbat meñ khaa.e haiñ kyā kyā
har ik fareb par ab tak yaqīn-e-mohkam hai

pyaar ke daraḳhtoñ ke
dil-fareb se saa.e

milānā aañkh kā har-dam fareb thā dekhā
phir ek dam meñ vo be-dīd āshnā na rahā

us ne kahā
ziine ajab fareb haiñ baabā

hai mere kā.enāt-e-tasavvur kā ik fareb
vo jalva-e-ḳhayāl ki duniyā kaheñ jise

mirī chāhatoñ meñ ġhurūr ho dil-e-nā-tavāñ meñ surūr ho
tumheñ ab ke khānā hai vo qasam ki fareb meñ bhī yaqīn ho

ḳhudā ke naam pe kyā kyā fareb dete haiñ
zamāna-sāz ye rahbar bhī maiñ bhī duniyā bhī

fareb-e-ārzū hī zindagī hai
sarāboñ meñ safar be-kār karnā

kījiye ġhaur to har lazzat-e-duniyā hai fareb
kaun daana hai yahāñ par jo tah-e-dām nahīñ

hastī ke mat fareb meñ aa jā.iyo 'asad'
aalam tamām halqa-e-dām-e-ḳhayāl hai

sitāra-e-shab-e-ġham kis pe muskurā.eñge
fareb-ḳhūrda-e-paimāñ hai kaun mere sivā

ba-qadr-e-paimāna-e-taḳhayyul surūr har dil meñ hai ḳhudī kā
agar na ho ye fareb-e-paiham to dam nikal jaa.e aadmī kā

use chāhā thā maiñ ne ki rok rakhūñ mirī jaan bhī jaa.e to jaane na duuñ
kiye laakh fareb karoḌ fusūñ na rahā na rahā na rahā na rahā

hameñ fareb-e-mohabbat qubūl hai lekin
jo khul ga.ī kabhī dil kī zabāñ to kyā hogā

mujh ko fareb de gayā tujh ko fareb de gayā
zahr pilā gayā farañg jām-e-zamāna-sāz se

jin kā maqsad fareb hotā hai
vo baḌī sādgī se milte haiñ