Tags-Dhoka

maiñ bāġhbānoñ kī sāzishoñ ko siyāsatoñ ko samajh chukā huuñ
ḳhizāñ kā khā kar fareb-e-paiham uThā ke barq-o-sharar kā dhokā

fareb thā aql-o-āgahī kā ki merī fikr-o-nazar kā dhokā
jo āḳhir-e-shab kī chāñdnī par huā thā mujh ko sahar kā dhokā

inhīñ kā naam mohabbat inhīñ kā naam junūñ
mirī nigāh ke dhoke tirī nazar ke fareb

pata chalā ki har ik gaam meñ thī ik manzil
khule haiñ manzil-e-maqsūd par safar ke fareb

samajh rahe the ki ashkoñ se hogā dil halkā
na jānte the ki haiñ ye bhī chashm-e-tar ke fareb

ye but-kade ye kalīsā ye masjideñ ye haram
ye sab fareb haiñ aur ek sañg-e-dar ke fareb

ho rāhzan kī hidāyat ki rāhbar ke fareb
mirī nigāh ne khaa.e nazar nazar ke fareb

vāhima ḳhallāq āzādī kā husn-afzā surūr
har fareb-rañg kā pahle gulistāñ naam thā

sadāqat bhī to ho jaatī hai maqtūl-e-fareb āḳhir
haqīqat bhī to ho jaatī hai afsānoñ se vābasta

fareb-e-sāda-dilī dekh us sitamgar ne
bayān raaz kiyā rāz-dāñ ke baare meñ

ye ġhol-vash haiñ in ko samajh tū na rahnumā
saa.e se bach ke ahl-e-fareb-o-daġhal ke chal

terā hī ek aks thā har sū nazar-fareb
dekhā to mere ā.īna-ḳhāne meñ kuchh nahīñ

fareb-ḳhurda-e-manzil hai kārvāñ varna
ziyāda rāhat-e-manzil se hai nashāt-e-rahīl

DhūñDhtā phirtā hai mujh ko kyuuñ fareb-e-rañg-o-bū
maiñ vahāñ huuñ ḳhud jahāñ apnā pata miltā nahīñ

fareb-e-zāt se bāhar nikal ke dekh mujhe
batā rahā huuñ zamāne kī ān-bān ko maiñ

be-haqīqat masarratoñ ke liye
zindagī bhar fareb khāte haiñ

fareb khāte chale jā rahe haiñ duniyā se
koī salīqa na Dhab zindagī guzārte haiñ

havā kī narm-ravī se javāñ huā hai koī
fareb-e-tañg-qabā.ī kā vaqt hai ki nahīñ

vo din tafraqa-ḳhez majbūriyoñ kā
fareb-e-muqaddar kī vo chīra-dastī

ridā-e-faqr bachā le ga.ī mujhe varna
fareb-e-atlas-o-kam-ḳhvāb mere sāmne thā