Tags-Dhoop

gungunātā jā rahā thā ik faqīr
dhuup rahtī hai na saayā der tak

maiñ ne lamhoñ meñ guzārī haiñ hazāroñ sadiyāñ
vaqt kī dhuup meñ pighlā huā dariyā dekhā

miyān-e-rāh kaḌī dhuup meñ na chhoḌ mujhe
batā to de ki kahīñ ghar kā rāsta bhī hai

pighal rahā huuñ khaḌī dhuup hai mire sar par
ki ik daraḳht kā saaya huuñ ghaT rahā huuñ maiñ

chale saath saath qadam qadam koī ye na samjhā ki haiñ baham
kabhī dhuup ban ke lipaT ga.e kabhī saaya ban ke judā hue

hamāre dasht ne itnā to intizām rakkhā
saroñ pe dhuup rahe koī sā.ebān na ho

ik dhuup sī tanī huī bādal ke ār-pār
ik pyaas hai rukī huī jharne ke bāvajūd

subah kī dhuup hai ki rastoñ par
munjamid bijliyoñ kā ik dariyā

dhuup kī bujhtī tamāzat kī sipar letā chalūñ
phir ufuq se dhīre dhīre vaqt-e-shām aatā huā

ḳhvāb ā.īne haiñ āñkhoñ meñ liye phirte ho
dhuup meñ chamkeñge TūTeñge to chubh jā.eñge

baḌī hī der talak dhuup mujh ko chhū na sakī
tumhāre sāya-e-dīvār se nikalte hue

udhar se dhuup ko aane nā dūñgā
tujhe kuchh yaad hai tū ne kahā thā

dhuup kī shiddat ne un ko kar diyā garche niDhāl
phir bhī chalne kī lagan 'betāb' rahgīroñ meñ hai

ye añdherī raat benām-o-nishāñ kar jā.egī
apne chehre par sunahrī dhuup kā ġhāza lagā

yak-ba-yak mausam kī tabdīlī qayāmat Dhā ga.ī
ruk ke sustānā thā jab mujh ko kaḌī dhuup aa ga.ī

dhuup zālim hī sahī jism tavānā hai abhī
yaad aa.egā kabhī sāya-e-ashjār mujhe

'ḳhāvar' kahīñ havā kā na hai dhuup kā guzar
ūñche haiñ sab makān mire aas paas ke

sar par thī kaḌī dhuup bas itnā hī nahīñ thā
us shahr ke peḌoñ meñ to saayā hī nahīñ thā

kahīñ bādal kahīñ sūraj kahīñ saaya kahīñ dhuup
mire ma.abūd tirā koī labāda bhī to ho

koī tasvīr mukammal nahīñ hone paatī
dhuup dete haiñ to saayā nahīñ rahne dete