Tags-Dhoop

saaya ho shajar kā to kahīñ baiTh ke dam leñ
manzil to bahut duur hai aur dhuup kaḌī hai

vaqt kī dhuup meñ kho.e mire nashshe kitne
ik tirī chashm-e-ḳharābāt abhī baaqī hai

dhuup meñ tark-e-marāsim kī jhulasne vaale
āḳhirī shām-e-mulāqāt abhī baaqī hai

sar-e-shām duur fazāoñ meñ ye jo aa.ine se chamak uThe
yahī Dhaltī dhuup ke rañg the ki jo tā.eroñ ke paroñ meñ the

ye kyā ki roz vahī chāñdnī kā bistar ho
kabhī to dhuup kī chādar bichhā ke so lete

dhuup ko kuchh aur jalnā chāhiye
jism kā saaya pighalnā chāhiye

sahrā sahrā bārish hai
dhuup kidhar se lā.ūñ maiñ

is dhuup se kyā gila hai mujh ko
saa.e ne jalā diyā hai mujh ko

sadiyoñ kī is dhuup chhāñv meñ koī hameñ batlā.e
puurī huī kaun sī us kī baat nahīñ dekhī

ye dhuup chhāñv salāmat rahe ki terā surāġh
hameñ to sāya-e-abr-e-ravāñ se miltā hai

shāyad is raah pe kuchh aur bhī raahī aa.eñ
dhuup meñ chaltā rahūñ saa.e bichhā.e jā.ūñ

ik kiran thaam ke maiñ dhūp-nagar tak pahuñchā
kaun sā arsh hai jis kā koī ziina hī nahīñ

jal gayā dhuup meñ yādoñ kā ḳhunuk saaya bhī
be-navā dasht-e-balā meñ koī ham sā bhī nahīñ

ābshāroñ kī tarah maiñ nahīñ girne vaalā
dhuup kī tarah pahāḌoñ se utāro mujh ko

shafaq ke rañg nikalne ke baad aa.ī hai
ye shaam dhuup meñ chalne ke baad aa.ī hai

kaisā guzishta din thā jo phir se guzārnā paḌā
dhuup bhī thī bachī huī saayā bhī thā bachā huā

shahr hai ḳhāmosh jaise ho khañDar
dhuup meñ jalte makāñ haiñ aur maiñ

is qadar dhuup thī sañvlā ga.e raḳhshāñ chehre
jalte sūraj kā magar rañg bhī piilā dekhā

vo dhuup meñ jo rahegā to ruup kho degā
chhupā le siine meñ palkoñ ke sā.ebān meñ rakh

safed dhuup ke tuude hī jan pe girte haiñ
inhī udaas gharoñ kī kathā.eñ maiñ likhtā huuñ