Tags-Dhoop

saa.e jhulas ke rah ga.e vaqt kī tez dhuup meñ
merā bhī rañg uḌ gayā terā bhī ruup Dhal gayā

maan bhī jaao ki sar par hai kaḌī dhuup abhī
Dūbtī shaam kā har rañg sunahrā hogā

qad-āvarī hai aur kaḌī dhuup kā hai qahr
ye ātishīñ-chīnār muqaddar hai kyā kareñ

kaun jaane ki uḌtī huī dhuup bhī
kis taraf kaun sī manziloñ meñ ga.ī

abr aa.egā tabhī pyaas bujhāne pahle
reg-e-sahrā kī tarah dhuup meñ jal kar dekho

kyā sabab hai dhuup hai sahmī huī
pattharoñ par bhī namī hai āj-kal

maiñ bārishoñ meñ bahut bhīgtā rahā 'ābid'
sulagtī dhuup meñ ik chhat bahut zarūrī hai

panāh DhūñDte guzrī hai zindagī 'kaifī'
jhulastī dhuup meñ saa.e ke ḳhvāb dekhe haiñ

dhuup hālāt kī ho tez to aur kyā māñgo
kisī dāman kī havā zulf kā saaya māñgo

safar meñ dhuup kī shiddat kahāñ tak jheltā āḳhir
tirī yādoñ ko oḌhā aur saaya kar liyā maiñ ne

tū apne face ko Dhañk kar nikalnā
nagar meñ dhuup pāgal ho rahī hai

mire kār-zār-e-hayāt meñ rahe umr-bhar ye muqāble
kabhī saaya dab gayā dhuup se kabhī dhuup dab ga.ī saa.e se

khil rahī hai ḳhvāhishoñ kī dhuup saare jism meñ
aañkh kholūñgā to ye tasvīr bhī kho jā.egī

saath letī jā hameñ bhī Dūbte sūraj kī dhuup
raat ke ġhāroñ meñ terī yaad ham ko aa.egī

tak rahe haiñ kis kī jānib najam ḳheme gaaḌ kar
dhuup niklegī to pahle mere ghar meñ aa.egī

garāñ thī dhuup aur shabnam bhī jin paudoñ ko gulshan meñ
tirī qudrat se vo phūle-phale sahrā ke dāman meñ

chaḌhtā sūraj dekh ke ḳhush haiñ kaun nahīñ samjhā.e
taptī dhuup meñ kumhlā.eñge ġhunche jaise log

dhuup sar par barahna-pā be-ghar
ḳhud-farāmoshī to gunāh meñ hai

bhare shahr meñ ek hī chehra thā jise aaj bhī galiyāñ DhūñDtī haiñ
kisī sub.h usī kī dhuup khilī kisī raat vahī mahtāb huā

jab hijr ke shahr meñ dhuup utrī maiñ jaag paḌā to ḳhvāb huā
mirī soch ḳhizāñ kī shāḳh banī tirā chehra aur gulāb huā