Tags-Dhoop

jazbe kī kaḌī dhuup ho to kyā nahīñ mumkin
ye kis ne kahā sañg pighaltā hī nahīñ hai

is ġhurbat kī dhuup meñ 'shā.ir' apnoñ kā saaya bhī na thā
jis ġhurbat kī dhuup meñ ham ko yaad aa.e begāne tak

dhuup chamkī to mehmāñ kī tarah
saaya dīvār-o-dar se niklā thā

sahal lagtā hai tujhe kyā safar-e-sher-o-suḳhan
umr-bhar dhuup meñ jhulse haiñ to saaya huā hai

raah taknā hai abas so jaao
dhuup dīvār pe aa baiThī hai

vo ham-safar thā magar us se ham-navā.ī na thī
ki dhuup chhāñv kā aalam rahā judā.ī na thī

roz jab dhuup pahāḌoñ se utarne lagtī
koī ghaTtā huā baḌhtā huā bekal saaya

kyuuñ bhaTaktā hai idhar aa ke zarā sustā le
is taraf dhuup hai bādal hai ghanere dil meñ

jis tarah dhuup meñ shajar koī
apnā lagtā hai mujh ko ġhairoñ meñ

sardiyāñ jo thiiñ sab sahīñ maiñ ne
dhuup ko arziyāñ nahīñ likhtā

na raas aa.ī kisī kī chhāñv 'shohrat'
ḳhud apnī dhuup hī meñ so ga.e ham

jahāñ pe kal tak thī chhāñv 'zākir' vahīñ pe Thahrī hai dhuup ab ke
ajab sitam hai kahīñ pe aa kar kahīñ ke mausam Thahar ga.e haiñ

paanī ke intizār meñ phir ret phāñkiye
'aḳhtar' ye din bhī dhuup kī daldal meñ dhañs gayā

phir is ke ba.ad kahāñ jā.eñge ye sāya-pasand
idhar kī dhuup kisī din udhar na paḌ jaa.e

dhuup kī man-māniyoñ par muskurāte the kabhī
in tanāvar peḌoñ par patte bache haiñ Dāl-bhar

dhuup meñ thoḌī sī gunjā.ish nikal aa.e to 'rind'
ek muTThī chhāñv kā hī sā.ebāñ de dījiye

tar sharm ke pasīne se aise hue haiñ raat
malbūs-e-ḳhās dhuup meñ sukhlā.e jaate haiñ

kise tū DhūñDhtā phirtā hai sard kamroñ meñ
maiñ dhuup se bhare maidāñ meñ ghar ke pīchhe huuñ

chandā jaisā ruup thā apnā phūloñ jaisī rañgat thī
tere ġham kī dhuup meñ jal kar kumlā.e murjhā.e ham

jaane kis shaḳhs kā muqaddar hai
dhuup meñ taptā be-sadā sahrā