Tags-Dhoop

siyāhī dhuup meñ hai baat kyā hai
agar ye sub.h hai to raat kyā hai

ham ġhubāroñ ke sahāre to bahut auj pe the
jab haqīqat kī lagī dhuup ġhubār TuuTe

dhuup ne tan-man phūñk diyā to saa.e meñ aa baiThā thā
shāḳh shāḳh meñ aag chhupī hai peḌ ke nīche baiThe kaun

kis qadar dhuup kamātā hai yahāñ koī ise
raunaq-e-mashġhala-e-shām se pahchānte haiñ

chal rahe haiñ dhuup se taptī huī saḌkoñ pe log
aur saa.e sā.ebāñ-dar-sā.ebāñ phaile hue

mileñge dhuup kī maarī chaTānoñ meñ bhī ḳhvāb-e-nam
koī ḳhushkī nahīñ aisī jahāñ tah meñ na paanī ho

mirī shohrat ke parcham uḌ rah the
magar maiñ dhuup meñ tanhā khaḌā thā

bahut zarūrī hai ye dhuup Tālne ke liye
shajar lagā ke tire falsafe ko aam kareñ

kal ḳhvāb meñ dekhā sakhī maiñ ne piyā kā gaañv re
kāñTā vahāñ kā phuul thā aur dhuup jaise chhāñv re

misl-e-abr-e-karam ham jahāñ bhī ga.e dasht ke dasht gulzār bante ga.e
zard chehre the jhulse hue dhuup se tāzgī pā ke gulnār bante ga.e

dhuup bolī ki maiñ ābā.ī vatan huuñ terā
maiñ ne phir sāya-e-dīvār ko zahmat nahīñ dī

patte patte pe na.ī rut ke ye likh deñ 'az.har'
dhuup meñ jalte hue jismoñ ko saayā denā

samay kī dhuup meñ kaisā bhī ġhussa suukh jaatā hai
magar maiñ kyā karūñ lahja bhī merā suukh jaatā hai

pighal ga.ī haiñ achānak ġhamoñ kī zanjīreñ
gire haiñ dhuup ke neze badan churā.e hue

soch kī dhuup to kyā kam hogī soch kī kirneñ aam huiiñ
raat ke saa.e mere sar ke sūraj par phailāo to kyā

mujhe Darā nahīñ saktī ye mushkiloñ kī dhuup
abhī ummīd kā baaqī hai ik shajar mujh meñ

is inqilāb pe kis kī nazar ga.ī hogī
ġhamoñ kī dhuup khilī hai ḳhushī ke chehre par

jis ko us ne raushnī samjhā thā merī dhuup thī
shaam hone kā mirī phir intizār us ne kiyā

din chaḌhā to dhuup kī mujh ko salībeñ de gayā
raat aa.ī to mire bistar ko daar us ne kiyā

sunahrī dhuup khilī hai ka.ī dinoñ ke ba.ad
phir un se baat huī hai ka.ī dinoñ ke ba.ad