Tags-Dhoop

mere dil meñ vo aa.e haiñ aise
jaise āñgan meñ dhuup aatī hai

raushan-dān se dhuup kā TukḌā aa kar mere paas girā
aur phir sūraj ne koshish kī mujh se aañkh milāne kī

bārish ke do bhīge tan par
dhuup utarne vaalī thī

dasht meñ ghamsān kā vo ran paḌā thā kuchh na pūchho
dhuup merī pusht par thī aur saayā sāmne thā

tulā hai dhuup barsāne pe sūraj
shajar bhī chhatriyāñ le kar khaḌe haiñ

dhuup chamkī raat kī tasvīr piilī ho ga.ī
din gayā aur sard tārīkī nukīlī ho ga.ī

hare-bhare peḌoñ ke uupar jin ke Thor Thikāne the
ab vo panchhī shor-e-zamīñ par dhuup meñ jalte rahte haiñ

tāroñ kī chhāñv narm hai sun letī hai pukār
din bhar kī dhuup meñ jo bilakte haiñ rāste

mire shīshamoñ kī chhāñv meñ haiñ dhuup ke Thikāne
mirī naddiyoñ kī lahroñ meñ hai aag kā baserā

jo bādaloñ se bhī mujh ko chhupā.e rakhtā thā
baḌhī hai dhuup to be-sā.ebān chhoḌ gayā

rahe muztarib kabhī muddatoñ ġham-e-dahr kī kaḌī dhuup meñ
jo sukūñ milā hai to so liye kabhī zer-e-gesū-e-yār ham

ye dhuup hai jo sar ko mire Dhāñp rahī hai
ye saaya mirā hai ki chhupā hai mire pīchhe

dhuup aisī tez dhuup garm hai fazā bahut
mileñge chhāñv DhūñDte barhana-pā ḳhudā bahut

gard ne ḳhema taan liyā thā
dhuup kā shīsha dhuñdlā sā thā

jo dhuup de gayā mujh ko vo merā sūraj thā
jo chhāñv de na sakā vo shajar na thā merā

kis kā chehra DhūñDā dhuup aur chhāñv meñ
aur ḳhvāboñ meñ rañg bhare to kis ke liye

tamām ḳhalq meñ rahtī hai dhuup rātoñ ko
vo mehr baam se jab tak utar nahīñ aatā

koī phuul dhuup kī pattiyoñ meñ hare ribbon se bañdhā huā
vo ġhazal kā lahja nayā nayā na kahā huā na sunā huā

ye kyā huā ki aaj bahut tez dhuup hai
saaya milā na shāḳh-e-tanāvar ke ās-pās

dhuup niklī din ko chehre se haTā lī jab naqāb
chāñdnī phailī jahāñ kapḌe utāre raat ko