Tags-Dhoop

kaTīlī dhuup kī shiddat ko bhī nazar meñ rakho
kisī daraḳht ko be-barg-o-bār karte hue

qadam qadam pe yahāñ ġham kī dhuup bikhrī hai
koī safar bhī ḳhushī kā safar nahīñ hotā

mere jaisī hai merī parchhā.īñ
dhuup meñ pal ke ye baḌī huī hai

tīrgī taaq meñ jaḌī huī hai
dhuup dahlīz par paḌī huī hai

bin bartī har chiiz meñ 'mohsin' ik din ghun lag jaatā hai
us Dar se ham apne badan ko dhuup lagāte phirte haiñ

shaam ke moḌ pe
kuchh dhuup paḌī thī jis meñ

kahāñ kahāñ liye phirtī hai zindagī ab tak
maiñ us jagah huuñ jahāñ dhuup hai na saaya hai

sāya-e-āftāb meñ barg o sharar ThiThur ga.e
barf kahāñ se aa ga.ī dhuup kā ruup dhaar kar

daraḳht dhuup se laḌtā hai is qadar din-bhar
phaloñ se shāḳhoñ se rahtā hai be-ḳhabar din-bhar

mirī nazar meñ tayaqqun kī dhuup raushan ho
kabhī to phaile vo rañg-e-shuhūd kī sūrat

tumhāre saa.e se uktā gayā huuñ
maiñ apnī dhuup vāpas chāhtā huuñ

har shaam le ke aa.egī paiġhām sub.h kā
har sub.h jal ke dhuup meñ laatī rahegī shaam

phire haiñ dhuup meñ saa.e ko saath saath liye
ki khul na jaa.e bharam apnī be-navā.ī kā

ghar se shāyad nikal paḌe vo bhī
aaj kuchh dhuup meñ tamāzat hai

dekh ai merī zabūñ-hālī pe hañsne vaale
vaqt kī dhuup ne kis darja nikhārā mujh ko

har shaḳhs haqā.eq kī kaḌī dhuup ke Dar se
taane hue auhām kī chādar nazar aayā

azm-e-safar hai dhuup kā sahrā hai aur maiñ
dariyā to saath chhoḌ gayā darmiyān se

jāgtā zehn ġham kī dhuup meñ thā
chhāñv paate hī so gayā jaise

māmtā kī chhāñv kī qadr jo nahīñ karte
dhuup un ko miltī hai sā.ebāñ nahīñ milte